Kryeministri i Kosovës, Albin Kurti i ka reaguar presidentit serb, Aleksandar Vuçiqit, duke e quajtur këtë të fundit “të obsesionuar” me kryekomandantin e UÇK-së, Adem Jasharin.
“Ai dëshironte që me 24 shtator ta shndërronte Manastirin Ortodoks të Banjskës në “Kullë të Jasharajve” për serbët e Kosovës! Në takimin e 2 majit në Bruksel na tha që Millan Radojçiq do të bëhet Adem Jashari i serbëve. Por, duke qenë diktator, ai s’e kupton historinë: epopeja dhe çlirimi nuk fabrikohen dhe as s’kopjohen“, shkroi Kurti.
Kurti tutje tha se Kosova është shtet demokratik dhe vend properëndimor dhe se kush integrohet, jeton më mirë.
Përmes një postimi në llogarinë e tij në Facebook, Kurti tha se serbët në Kosovë nuk kanë nevojë për çlirim nga Republika e Kosovës por nga veglat terroriste të Serbisë.
