Kryeministri i Kosovës, Albin Kurti, ka përkujtuar sot masakrën e 17 prillit 1999 në Poklek, në të cilën u vranë mizorisht 53 civilë shqiptarë nga forcat serbe, në mesin e tyre edhe pesë foshnje.
Ai tha se trupat e viktimave u dogjën tri herë për të zhdukur gjurmët e krimit, ndërsa familjarët ruajtën hirin dhe kujtimin për të dashurit e tyre.
Postimi i plotë:
Sot përkujtojmë një nga aktet më të tmerrshme të gjenocidit të Serbisë mbi civilët shqiptarë. 53 jetë të pafajshme u shuan mizorisht në shtëpinë e familjes Muqolli. Pesë prej tyre ishin foshnje.
Pas sulmeve me armë zjarri, kriminelët serbë u kthyen dhe i dogjën trupat tri herë, për të zhdukur gjurmët e këtij krimi mizor.
Familjarët mblodhën hirin e të dashurve të tyre dhe ruajtën të freskët kujtimin për ta. Tani ata prehen bashkë, në lavdinë e përjetshme.
Dëshmitë e këtij krimi gjenocidal ruhen brenda shtëpisë-muze të familjes Muqolli të Poklekut, të muzealizuar me mbështetjen institucionale të Qeverisë së Republikës së Kosovës.
Drejtësia ende mungon. I bëjmë thirrje për veprim, sërish e vazhdimisht, sistemit të drejtësisë në Kosovë.
Dëshmimi dhe dokumentimi i krimeve është përgjegjësi dhe kontribut kombëtar. Besnikëria ndaj historisë sonë dhe insistimi në drejtësi për viktimat e krimeve janë aleatët kryesorë të së vërtetës.
Me mirënjohjen e thellë për qëndresën, sakrificën dhe kurajën e familjarëve, përkujtojmë të vrarët më 17 prill 1999.
E përjetshme është kujtesa e sakrificës së madhe për liri. Lavdi të gjithë martirëve dhe dëshmorëve të kombit!.
