Kryeministri i Kosovës, Albin Kurti është duke qëndruar edhe sot në Uashington, pas nënshkrimit të marrëveshjes Kompakt me MCC-në gjatë ditë së djeshme.
Duke folur për zbatimin e reciprocitetit me targa dhe dokumente serbe, u ka kërkuar qytetarëve serbë, që nga 1 gushti, t’i konvetojnë targat e tyre ilegale në ato legjitime të Republikës së Kosovës, transmeton KosovaNews.
“Para më shumë se 1 muaji, ne kemi marrë dy vendime në Qeverinë e Republikës së Kosovës. Në njërën anë, japim një afat dy mujor, i cili fillon prej të hënës së 2 gushtit, që kërkohet nga qytetarët e Republikës të nacionalitetit serb me targa të automjeteve nga koha e Millosheviqi siç janë PR, KM, PE UR, GL, DJ, PZ e kështu me radhë, t’i konvertojnë ato në targa legjitime dhe legale të republikës së Kosovës. Ne kemi ofruar edhe lehtësime për një konvertim të tillë”, theksoi Kurti për Zërin e Amerikës.
Ai, ka theksuar se nga e hëna do të filloj zbatimi i reciprocitetit me dokumente serbe, masë marrë kjo e cila merret 11 vite pas Serbisë.
“Gjithashtu nga e hëna, të gjithë ata që kanë dokumente të lëshuara nga Serbia dhe duan që të hyjnë në Kosovë, ne do t’i pajisim me një dokument të veçantë, i cili tregon që ata do të mund të lëvizin lirisht në Republikën e Kosovës. Kjo është një masë që ne e marrim 11 vjet pasi që këtë tashmë e ka ndërmarrë Serbia.”, ka thënë Kurti.
Duke theksuar se këto janë masa për ligj e barazi, e kundër askujt, kryeministri Kurti deklaroi se Serbia vet e ka pranuar në Bruksel që targat ilegale në Veri të Kosovës, duhet të marrin fund. Mirëpo duket që po i pengon zbatimi.
“Ne nuk jemi kundër, qytetarëve serbë, përkundrazi, ne dëshirojmë që me ata të bashkëpunojmë për të mirën e përgjithshme dhe në zbatim të ligjit dhe respektim të kushtetutshmërisë.”, theksoi Kurti./KosovaNews/
