Kryeministri në detyrë i Republikës së Kosovës, Albin Kurti, ka bërë të ditur se Prokuroria Speciale ka ngritur aktakuzë ndaj tre personave lidhur me shpërthimin terrorist të 29 nëntorit 2024 në kanalin Ibër–Lepenc, pas një bashkëpunimi të shkëlqyer dhe hetimi të suksesshëm nga institucionet e inteligjencës dhe të sigurisë.
“Siç e kam thënë në konferencën e jashtëzakonshme, pak orë pas shpërthimit të kanalit, në bazë të informacioneve që kam marrë nga institucionet e sigurisë, sulmi ka ardhur nga Serbia, fqinji ynë verior, agresiv e armiqësor,” deklaron Kurti.
Ai shton se hetimet janë në rrugë të mbarë dhe se janë siguruar prova që tre të akuzuarit kanë qenë në vendngjarje natën kritike. Kryeministri falënderoi institucionet përkatëse dhe FBI-në për punën profesionale në këtë rast.
“Mund t’ju siguroj se, në bazë të informacioneve të inteligjencës, të akuzuarit kanë qenë pjesë e strukturave ilegale të Serbisë dhe janë në mesin e të përfshirëve në realizim të sulmit,” thekson ai.
Sipas Kurtit, procesi gjyqësor do të dëshmojë se të akuzuarit ishin të lidhur me “mikun e Vuçiqit, terroristin Millan Radoiçiq” dhe me struktura të tjera shtetërore të Serbisë që, siç thotë ai, “planifikuan dhe urdhëruan sulmin terrorist.”
Ai akuzon Beogradin zyrtar për mohimin e përgjegjësisë dhe përfshirjen në veprime hibride të dezinformimit:
“Përkundër faktit se Beogradi zyrtar mohonte përgjegjësinë… aktakuza e ngritur dhe epilogu i rastit, pa fije dyshimi, do të konfirmojnë të dhënat dhe vlerësimet e institucioneve të Republikës së Kosovës.”
Kryeministri thekson rëndësinë e mbrojtjes së integritetit territorial, sovranitetit dhe sundimit të ligjit:
“Rasti i fundit dëshmon që në Kosovë nuk kalon pa ndëshkim terrorizmi, sado perfid të jetë, dhe nuk mund të kalojë pa u vërejtur dhe dekonstruktuar dezinformimi.”
Në fund, ai falënderon institucionet e sigurisë dhe partnerët ndërkombëtarë.
“Falënderojmë institucionet e sigurisë, partnerët ndërkombëtarë në krye me ShBA-të… për kontributin që po ofrojnë për një Kosovë gjithnjë e më të sigurt e paqësore, më të fuqishme në aspektin ekonomik, ligjor, integrues dhe demokratik.”
