Kryeministri i Kosovës, Albin Kurti, ka numëruar aksionet dhe veprimet e ndërmarra kundër krimit të organizuar dhe korrupsionit gjatë vitit të kaluar.
Kurti përmes një postimi në Facebook, tha se janë realizuar 854 operacione policore kundër kontrabandës, prej të cilave janë arrestuar 3 mijë e 202 persona,prej tyre 301 të cilët ishin zyrtarë publikë.
Kurti po ashtu shtoi se janë mbyllur 16 rrugë ilegale në veri të vendit, duke shkatërruar pesë laboratorë të drogës dhe tre sosh për prodhimin e paligjshëm të kriptovalutave, transmeton KosovaNews.
Sipas Kurtit, mbi 14 milionë euro janë ngrirë nën dyshimin e keqpërdorimeve dhe shpëlarjes së parave.
I pari i Qeverisë së Kosovës tha se janë ndërtuar katër objekte dhe stacione policore në veri të Kosovës.
Postimi i Plotë:
2022: Qeveria kundër krimit të organizuar dhe korrupsionit
Gjatë vitit që lamë pas, kemi vazhduar me zbatimin e ligjshmërisë në gjithë territorin e Republikës:
U realizuan 854 operacione policore kundër krimit të organizuar dhe kontrabandës;
U arrestuan 3202 veta, prej tyre 301 zyrtarë publikë;
Mbyllëm 16 rrugë ilegale në veri të vendit;
Shkatërruam 69 grupe kriminale;
U konfiskuan mbi 1.8 ton substanca narkotike;
Shkatërruam 5 laboratore të drogës në veri të Kosovës, me vlerë qindra milionëshe në substanca dhe në pajisje si dhe 3 laboratore për prodhimin e kriptovalutave, po ashtu në veri;
Mbi 14 milionë euro janë ngrirë nën dyshimin e keqpërdorimeve dhe shpërlarjes së parave;
Janë sekuestruar mbi 300 mijë litra karburante që s’ishin konform me aktet nënligjore;
Ndërtuam 4 objekte dhe stacione policore në veri të Kosovës si dhe bëmë shtrirjen e rrjetit optik në atë pjesë të vendit tonë, duke mundësuar shtrirjen e valëve telefonike, rrjetit të internetit dhe komunikimit me radiolidhje;
Krijuam Njësitin e Ndërhyrjes së Shpejtë të Kufirit, në kuadër të Policisë së Kosovës, i cili angazhohet në luftimin e kontrabandës, trafikimit me qenie njerëzore dhe keqpërdorimeve të tjera përgjatë vijës kufitare.
