Kryeministri i Kosovës, Albin Kurti derisa iu ka drejtuar Forumit të Paqes në Paris tha se Kosova ka filluar normalizimin e marrëdhënieve me Serbinë, ndërkaq edhe pas 11 vjetësh, raportet nuk janë më të mira sesa para një dekade dhe sipas tij ka një arsye të qartë për këtë.
Ai theksoi se paqen dhe sigurinë në Evropë, përveç Rusisë, po e sfidon edhe Serbia.
Sipas kreut qeveritar, Serbia ka dështuar më demokratizimin e vetë dhe kërkon më shumë konflikt se sa bashkëpunim.
“Serbia ende i jep lavdi kriminelëve të luftës në vend se t’i dënojë e gjykojë. Kam frikë që Serbia nuk është as demokratike as e pavarur, është një regjim që udhëhiqet nga Kisha Ortodokse e dominohet nga Rusia e Putinit. Paqja dhe siguria në Evropë nuk po sfidohet vetëm në lindje nga Rusia, por edhe në juglindje nga Serbia. Ata nuk kanë kufij të përbashkët, por kanë qëllime të përbashkëta. I shohin shtetet me thjerrëza të etnisë sepse nuk besojnë në vlerat e demokracisë”, ka thënë Kurti.
Kurti gjatë bisedës në kuadër të Forumit për Paqe në Paris, ka thënë se Kosova është e gatshme që Serbisë t’ia shtrijë dorën dhe të krijojë marrëdhënie të mira fqinjësore, por ngriti dyshime se Serbia mund ta bëjë të njëjtën gjë.
“Kosova kërkon marrëdhënie fqinjësore të mira me Serbinë fqinje dhe jemi të gatshëm të zgjasim dorën për një vend që ka kryer gjenocid ndaj vendit tonë. Nëse ata janë gati t’i çlirojnë grushtet e tyre. Ajo që nuk ofrojmë më janë koncesionet për të ndarë vendin tonë në vija etnike e të tjera”, tha tutje ai.
Kurti foli edhe për mosnjohjen e 5 shteteve anëtare të BE-së dhe tha se ato mund ta bëjnë këtë sepse kështu do ta ndihmonin edhe Serbinë që ta pranonte më shpejtë Kosovën.
“Nëse Serbia nuk është gati, le të na njohin pesë shtetet anëtare të Evropës. Nuk kanë nevojë të presin, mund ta ndihmojnë Serbinë që të na pranojë më shpejtë nëse ata na pranojnë së pari”, tha kryeministri.
Gjatë këtij fjalimi kreu qeveritar nga Parisi tha se paqja dhe siguria në Evropë nuk po sfidohet vetëm në lindje nga Rusia, por edhe në juglindje nga Serbia.
“Ata nuk kanë kufij të përbashkët, por kanë qëllime të përbashkëta për dominim. I shohin shtetet me thjerrëzat e etnisë sepse nuk besojnë ne vlerat e demokracisë, ku qytetaria ka të bëjë me bindje ndaj institucioneve të ligjshme dhe përqafimin e vlerave të lirisë, demokracisë dhe të drejtave të barabarta. Kjo është themelore dhe duhet të jemi vigjilent dhe nuk mund të lejojmë që fashizmi të fitojë legjitimitet për shkak se kontinenti ynë është vënë në zjarr disa herë. Atë që, ne, e shohim në Ukrainë është e qartë, është fashizëm rus”, tha Kurti.
Tutje Kurti ka thënë se ekziston rrezik përreth kufijve me Serbinë, por ka thënë se Kosova mbështetet në NATO-n.
“Rreth kufijve të Kosovës me Serbinë, ekzistojnë 48 baza të veprimit në pararojë me qindra mijëra ushtarë, 28 prej të cilave në xhandarmëri dhe 20 të tjera ushtarake. Është rrezik për vendin tonë, jemi shumë vigjilent por asnjëherë të frikësuar. Kosova nuk është në NATO, por Kosova është brenda NATO-s. Historia e Kosovës dhe e NATO-s janë të ndërthura dhe e ardhmja e tyre është e ndërthurur. Duhet sa më shpejtë të integrohemi në NATO”.
Në Forumin për Paqe në Paris, bashkë me kryeministrin Kurti po merr pjesë edhe presidentja e Kosovës, Vjosa Osmani.
Dje, në Pallatin Elysée, Osmani dhe Kurti janë pritur nga presidenti i Francës, Emmanuel Macron.
Osmani në një postim tha se bashkë me Macron kanë diskutuar për partneritetin mes dy shteteve, dinamizimin e dialogut me Serbinë si dhe zhvillimet e fundit në Kosovë.
Ndërsa, temë diskutimi mes Kurtit, Osmanit e Macron kanë qenë zhvillimet e fundit mes Kosovës dhe Serbisë.
