Lëvizja Vetëvendosje ka mbajtur tubim elektoral në Lipjan, ku kryeministri në detyrë dhe lideri i partisë, Albin Kurti, para qytetarëve ka kërkuar një mandat edhe më të fuqishëm në zgjedhjet e 7 qershorit.
Sipas njoftimit të LVV-së, Kurti deklaroi se pas rezultatit prej 51 për qind në zgjedhjet e fundit, synimi tashmë është që mbështetja qytetare të rritet drejt 60 për qind, me numrin 116 në fletëvotim.
Në fjalimin e tij, ai përmendi disa nga vendimet që, sipas tij, janë realizuar gjatë javëve të para të Qeverisë Kurti 3, përfshirë votimin e ligjit për çmimet tavan për produktet bazë, pagën e 13-të për punëtorët e sektorit publik dhe buxhetin prej 4 miliardë euro.
Kurti po ashtu u bëri thirrje qytetarëve të Lipjanit që t’i ftojnë familjarët e tyre në diasporë të regjistrohen për votim në zgjedhjet e 7 qershorit, në rast se nuk mund të vijnë fizikisht në Kosovë për të votuar.
“Do të vazhdojmë me punë të mira përmes mandatit edhe më të fortë që na pret”, thuhet në mesazhin e publikuar nga LVV pas tubimit në Lipjan.
