Kryeministri i Kosovës, Albin Kurti, ka njoftuar se delegacioni i Kosovës, pas vizitës në Davos dhe në Shtëpinë e Kosovës atje, ka vazhduar drejt Baselit për pjesëmarrje në panairin ndërkombëtar të drurit dhe ndërtimit “Swissbau 2026”, një nga panairet më të rëndësishme të këtij sektori në Evropë.
Kurti thekson se pas pandemisë, prezantimi i Kosovës në panaire ndërkombëtare është rifilluar pikërisht në Swissbau në maj të vitit 2022, atëkohë me 8 biznese pjesëmarrëse, ndërsa sivjet Kosova po përfaqësohet me 27 biznese vendore.
“Sot, në të njëjtin panair, po mbështesim tashmë 27 biznese vendore”, shkruan Kurti në postimin e tij.
Sipas tij, Kosova është në mesin e 19 shteteve të botës që po marrin pjesë në Swissbau 2026 dhe është i vetmi shtet nga rajoni që po përfaqësohet në këtë edicion, me një hapësirë ekspozuese prej rreth 700 metrash katrorë.
Pjesëmarrja e Kosovës është mbështetur nga Agjencia për Investime dhe Përkrahjen e Ndërmarrjeve në Kosovë (KIESA), në kuadër të Ministrisë së Industrisë, Ndërmarrësisë dhe Tregtisë.
Swissbau konsiderohet një nga panairet më të rëndësishme evropiane të sektorit të drurit dhe ndërtimit, i cili vizitohet nga mbi 52 mijë vizitorë profesionistë, ndërsa sivjet po marrin pjesë gjithsej 592 biznese nga 19 shtete të ndryshme të botës.
