Kryeministri në detyrë i Kosovës, Albin Kurti, e ka uruar ekipin e Kosovës për fitoren ndaj Çekisë.
Kosova e ka nisur me fitore Kampionatin Evropian për Esports në video-lojën Counter Strike 2, ndaj Republikës Çeke, event ky që po mbahet për herë të parë në vendin tonë.
Kosova tregoi performancë të lartë ndaj Çekisë, duke dominuar në të gjitha aspektet, për të marrë një fitore komode 2:0 në mape.
Kryeministri Albin Kurti e ka vlerësuar rolin e Kosovës si nikoqire duke uruar për sukses ekipin kombëtar, që e nisi kampionatin me fitore ndaj Republikës së Çekisë.
“Në Counter-Strike dhe Dota 2, e gjithë Evropa është në Kosovë. Këtë javë, Prishtina është qendra e Evropës në sportet elektronike, ku 35 ekipe nga 24 shtete garojnë për trofetë e Kampionatit Evropian të Esports. Aty ku sporti dhe teknologjia takohen, padyshim që rinia jonë shkëlqen. Kosova e nisi me fitore kundër Republikës së Çekisë, një debutim i fuqishëm që na jep besim dhe krenari. Suksese tutje djemve tanë, jemi me ju!”, ka shkruar Kurti në rrjetet sociale.
