Kryeministri i vendit Albin Kurti, i është kundërpërgjigjur kërkesave të kryetarit të PDK-së, Memli Krasniqi dhe atij të LDK-së, Lumir Abdixhiku, të cilët thanë se kriminelët në veri duhet të arrestohen.
Kurti ka ironizuar me dy liderët opozitarë, duke i pyetur se si duhet t’i bëjë këto arrestime, me koordinim me ndërkombëtarët apo pa u koordinuar.
“Ju falënderoj për thirrjen që ti arrestoj kriminelët. E kam një pyetje për ju, arrestimin ta bëjë me koordinim a pa koordinim. Ju bëtë thirrje që Njësia Speciale të marr urdhër t’i arrestoj kriminelët. Ju falënderoj për këtë sjellje shtetërore. Për shkak të diskursit tuaj, më duhet të ju pyes, a me koordninim a pa koordinim? Pra, arrestimin po e bëjmë se ju thatë, ma dhatë mbështetjen, nëse kam pasur një dileme ju ma hoqët, por më tregoni me koordinim a pa koordinim”, ka thënë ai.
Tutje Kurti ka shkaktuar të qeshura edhe kur i është drejtuar deputetit të PDK-së, Abelard Tahiri dhe e pyeti se a duhet të arrestohen kriminelët “me shurdhuese apo pa shurdhuese”, duke duke aluduar kështu në një revole të blerë me para të shtetit, revole kjo me silenciator që barte vite më parë deputeti Tahiri.
Kujtojmë se paraprakisht gjatë fjalimit kryeministri i Kosovës, Albin Kurti, tha se kryetarët e rinj të komunave në veri të Kosovës u shoqëruan me forca të sigurisë për shkak se është dashur të sigurohet hyrja e tyre në objekte komunale pa pengesa.
Këto deklarata kryeministri Kurti i bëri gjatë seancës së Kuvendit të Kosovës ku po debatohet për situatën në veri të Kosovës. Ai theksoi se ky nuk ishte vendim politik.
Kryeministri Albin Kurti në këtë rast ka publikuar emrat e disa prej njerëzve që ka thënë se janë organizatorët kryesorë të trazirave në veri ditëve të fundit.
