Kryeministri i vendit Albin Kurti dhe ministri i Punëve të Brendshme, Xhelal Sveçla, kanë thënë se ligji i pagave dhe ai për zyrtarët publikë kanë qenë të nevojshëm për reformë të thellë në administratën publike, që sipas tyre, tash do të ketë drejtësi dhe barazi për të gjithë, raporton KosovaNews.
Në një konferencë të përbashkët me ministrin Sveçla, kreu i Qeverisë tha se ka pasur shumë probleme me këto ligje, për shkak të abuzimeve që kanë ndodhur në të kaluarën.
“Ashtu siç kemi thënë, hartimi i këtyre dy projektligjeve nuk ka qenë proces i lehtë dhe i shpejtë. 40% e zyrtarëve nuk dihej se ku ishin. Ka pasur 170 lloje të shtesave dhe kompensimit. Mungesë të kriterëve se si janë marrë shtesat. Ka pasur zyrtarë që merrnin pagë të ndryshme për punë të njëjtë. Zyrtarët tanë duhet të kenë trajtim të barabartë. Djem dhe vajzat tona duhet të kenë mundësi të jenë pjesë e agjencive e institucioneve duke konkurruar në konkurse ku do trajtohen në mënyrë të barabartë me gjithë zyrtarët. Këtë po e synojmë”, ka thënë Kurti në konferencë për shtyp pas mbledhjes së Qeverisë.
Ndërsa ministri i Punëve të Brendshme, Xhelal Sveçla ka njoftuar se Projektligji për Pagat ai për Zyrtarët Publik nga nesër do të janë në konsultim publik.
Sveçla ka thënë se tani Kosova do ta ketë për herë të parë një projektligj që rregullon pagat në sektorin publik.
“Qeveria dhe MPB-ja janë angazhuar me synime të qarta: drejtësi, barazi, llogaridhënie dhe transparencë për të gjithë”, ka thënë Sveçla.
Sveçla tregoi se për 15 ditë do të jetë i hapur periudha për komente dhe sugjerime për këto projektligje, shkruan Telegrafi.
“Janë zhvilluar me dhjetëra takime për të dëgjuar secilin propozim dhe nga secila këto projektligje, ku nga sot i keni konkluzionet tona, ku do t’i presim komentet shtesë deri në finalizimin të tyre dhe procedim të tyre deri në instanca të tjera. Për 15 ditë pune, nga nesër në mëngjes, të dy projektligjet do të janë në konsultim publik, brenda të cilës kohë, të gjithë do të kenë mundësi që ta adresojnë çdo koment apo sugjerim me këto projektligje, apo pjesë të caktuara”, ka përfunduar ai.
Projektligjet për paga dhe ai për zyrtarët publikë do të jenë nga e enjtja në konsulta publike./KosovaNews/
