Presidentja e Republikës së Kosovës, Vjosa Osmani Sadriu, kryeministri Albin Kurti dhe zëvendëskryeministrja Donika Gërvalla kanë bërë homazhe te shtatorja e heroit Zahir Pajaziti, në 26 vjetorin e rënies së heronjve Zahir Pajaziti, Hakif Zejnullahu dhe Edmond Hoxha.
Në këtë përvjetor ata thanë së themelet e Republikës janë ndërtuar mbi gjakun e dëshmorëve të Kosovës dhe ata ishin kushtrimi i Ushtrisë Çlirimtare të Kosovës.
E para e vendit, Vjosa Osmani, tha se sot kujtohen të gjithë ushtarët e UÇK-së që ranë për lirinë e Kosovës.
“Kjo ditë është një ditë më e lavdishme të historisë së i Ushtrisë çlirimtare të Kosovës, themelet e Republikës janë ndërtuar mbi gjakun e dëshmorëve”, tha ajo, raporton RTKlive. Sipas saj respekti për ta do të jetë i përjetshëm.
Kurse kryeministri Albin Kurti, theksoi se Zahir Pajaziti, Hakif Zejnullahu dhe Edmond Hoxha, janë kushtrimi i Ushtrisë Çlirimtare të Kosovës.
“Ata ishin kushtrimi për luftë çlirimtare, por njëkohësisht ishin edhe pararendës të Ushtrisë Çlirimtare të Kosovës meqenëse ata kryenin aksione çlirimtare edhe para se të fillonte lufta. Duke kujtuar e përkujtuar komandantin Pajaziti dhe dëshmorët e tjerë të kombit, në të njëjtën kohë ne tregojmë se sa i madh ishte çmimi për lirinë tonë, për shtetin tonë, për pavarësinë tonë dhe se sa i vlefshëm për të tashmen dhe të ardhmen është ky kujtim e ky përkujtim që bëhet si nga institucionet po ashtu edhe nga qytetarët e vendit tonë”, tha Kurti.
Ndërsa zëvendëskryeministrja Donika Gërvalla, tha se sot kujtojnë të gjithë trimat, ushtarët e Ushtrisë Çlirimtare të Kosovës.
Ndryshe më 31 janar të vitit 1997 ndodhi njëra nga betejat e para madhore të pjesëtarëve të Ushtrisë Çlirimtare të Kosovës.
Tre strategët, Zahir Pajaziti, Hakif Zejnullahu dhe Edmond Hoxha ishin duke udhëtuar nga Prishtina në drejtim të Vushtrrisë, derisa grupi i tyre zbulohet nga sigurimi serb, të cilët kishin vënë pritë në fshatin Pestovë, ku të tre bien heroikisht në luftë me ta.
Aktivitetet ushtarake, Zahir Pajaziti i filloi gjatë viteve 90-ta. Në rrethanat e krijuara gjatë grevave të përgjithshme në Kosovë të mbajtura më 3 shator të vitit 1990, Zahiri dhe aktivistët tjerë filluan të punojnë për ngritjen e një rrjeti sigurimi në Kosovë.
