Analisti Bleron Baraliu i cili jeton në Shtetet e Bashkuara të Amerikës (ShBA) ka reaguar pas arritjes së marrëveshjes për targat mes Kosovës e Serbisë mbrëmë në Bruksel.
Ai tha se gjatë ditëvce të fundit kryeministri Albin Kurti ka arritur të rris bërthamën e lojës dhe të vendosë Kosovën në pozicion fitues.
“Si dhe, tepër sinjifikante, ka arritur të sjellë ShBA prapë në qendër, siç e pranoi deklarativisht vetë gojëdhënësi i Borrellit. E sa për pseudo-gazetarë nihilistë që ujin e derdhin (me apo pa vetëdije) në mullirin e kauzave vasaliste e putineske, edhe sikur të kthehej Albini me njohje të pavarësisë së Kosovës nga Serbia, bashkë me Preshevë brenda, ata të njëjtës daulle do t’i binin”, ka shkruar Baraliu.
Këtu keni reagimin e plotë të analistit Baraliu:
Në vend të përgjigjes për të ngazëllyerit pro-vuciciste të ‘thyerjes’ së rrejshme në Bruksel që ata projektojnë.
Ende nuk është e qartë se çfarë ‘quo’ potencialisht ka marrë Albini/Kosova për ‘quid’in e dhënë, por në çdo variant taktizimi i deritashëm ka qenë me rezultat domethënës dhe mbresëlënës për Kosovën.
Pra, edhe pse Albini nuk është as ka qenë asnjëherë jashtëzakonisht i shkathët në dinakëri politike e pazare tipike diplomatike, pa fare chipa në brez ka arritur të rris bërthamën e lojës dhe të vendosë Kosovën në pozicion fitues.
Si dhe, tepër sinjifikante, ka arritur të sjellë ShBA prapë në qendër, siç e pranoi deklarativisht vet gojëdhënësi i Borrellit.
E sa për pseudo-gazetarë nihilistë që ujin e derdhin (me apo pa vetëdije) në mullirin e kauzave vasaliste e putineske, edhe sikur të kthehej Albini me njohje të pavarësisë së Kosovës nga Serbia, bashkë me Preshevë brenda, ata të njëjtës daulle do ti binin?
Vetëm nën naivitet maksimal mund të ketë qenë i bindur dikush se në fund, karshi Amerikës, Albini nuk do ti ‘sakrifikonte’ targat. Por, kjo nuk domethënë se kjo ishte fjala e parë… Me i pas dëgju tallalët znaçkitrgovanci, këtë Albini do ta bënte qysh në fillim dhe pa asnjë lev as çmim.
Dhe këtu, të dashur miq, është krejt thelbi i kornizës së negocimit me ndërkombëtarë karshi Serbisë dhe shërbëtorëve, kolaboracionistëve, e mbështetësve të saj në veri të Kosovës, në jug të Kosovës, dhe në Bruksel me rrethinë.
