Zëdhënësi i Qeverisë së Kosovës, Përparim Kryeziu ka thënë se seanca e jashtëzakonshme e Kuvendit të Kosovës sot ka nxjerrë konkludim të debatit parlamentar para se të fillonte ai.
“Seanca e sotme, në mënyrën se si ishte ftuar, nxjerrte konkludim të debatit parlamentar, para se të fillonte vet debati. Pak sikur, së pari gjykimi mbi rastin, e pastaj hetimi për rastin”, ka shkruar Kryeziu.
Tutje ai ka shkruar se rendi i ditës së seancës së sotme ishte “Debat parlamentar lidhur me dështimin e Qeverisë së Republikës së Kosovës për sigurimin e teksteve shkollore për nxënësit e nivelit të arsimi fillor dhe arsimit të ulët të mesëm të ulët për vitin 2023/25”, duke aluduar se deputetët e opozitës kanë konkluduar për dështimin e procedurës.
Ndërkohë debati parlamentar për çështjen e furnizimit me tekste shkollore të nxënësve të shkollave fillore ka dështuar të mbahet, pasi deputetët e Lëvizjes Vetëvendosje nuk morën pjesë. Seanca e jashtëzakonshme u thirr nga partitë opozitare.
