Deputetja e Lëvizjes Vetëvendosje, Arbëreshë Kryeziu, ka thënë se Asociacioni nuk mund të krijohet me partitë opozitare.
Duke komentuar deklaratën e emisarit të ShBA-së për Ballkanin Perëndimor, Gabriel Escobar dhënë ditë më parë, se nëse Qeveria e Kosovës nuk e themelon Asociacionin, atëherë ShBA-ja do të diskutojë me partnerë alternativë në Kosovë për ta themeluar atë, Kryeziu ka thënë se vendime të tilla mund të merren pa Qeverinë.
“Kemi Esocbarin i cili thotë se duhet të krijohet Asociacioni dhe nëse nuk krijohet do të flasim me partnerë alternativë. Nëse është fjala për të krijuar diçka, është vetëm një organ me të cilin mund të flasësh, dhe është Qeveria pavarësisht kush është në krye të asaj qeverie. Po e marrim hipoteteikisht që dëshiron të flasësh me partitë opozitare, po çfarë mund të bëjnë partitë opozitare në kuptimin e themelimit të Asociacionit. Nuk mund të ketë themelim të Asociacionit me partnerë alternativë. Gjithçka çka mund të bëhet, mund të bëhet përmes dialogimit me Qeverinë e Kosovës”, ka thënë Kryeziu të premten në.
Ajo ka deklaruar se Qeveria e Kosovës nuk dëshiron të themelojë një asociacion që do të shkaktonte telashe për Kosovën.
“Nuk mund ta krijojmë një Asociacion që i jep kompetenca ekskluzive një pakice, që janë serbët”, është shprehur ajo.
E pyetur për rastin e ambasadorit të Kosovës në Kroaci, Martin Berishaj, Kryeziu ka thënë se po presin fjalën e organeve të drejtësisë dhe se nuk mund ta marrin për bazë një informacion, që siç ka thënë, vjen nga një gazetar që shpërndan lajme të rreme.
“Derisa është ngritur kallëzimi penal, duhet të presim vendimin dhe fjalën përfundimtare të organeve të drejtësisë. Nuk mund ta gjykojmë vetëm pse kemi parë një informacion që ka rrjedhur prej një pseudo-gazetari, nëpërmjet një portali krejtësisht të parëndësishëm dhe që është shpërndarë nga portalet tjera pa u vërtetuar. Aq më tepër kur ka ardhur prej një gazetari që njihet si përkrahës i Putinit dhe si një gazetar që në vazhdimësi ka shpërndarë informacione të rrejshme. Këtu ka shumë dyshime për të bërë të mendosh se këtu ka pasur diçka”, ka thënë Kryeziu.
