Kryetari i Komunës së Zveçanit, Ilir Peci ka thënë se nuk ka marrë ndonjë kërkesë zyrtare për dorëheqje nga Qeveria dhe as nga ndërkombëtarët, andaj thotë se është shumë herët të flasë për një gjë të tillë.
Peci ka thënë se më 24 shtator në Banjskë të Zveçanit është kryer sulm terrorist nga Serbia dhe se bashkësia ndërkombëtare duhet të marrë masa.
“Ka qenë një sulm terrorist i organizuar nga Serbia. Ka qenë një ditë shumë e vështirë për mua si kryetar komune, por edhe për të gjithë qytetarët e Republikës së Kosovës. Mirëpo, falë policisë gjithçka brenda asaj dite ka përfunduar mirë dhe tani situata është më e qetë dhe gjendja është stabilizuar pak në komunën e Zveçanit. Një organizim aq i madh, me u sulmu policia në shtetin e vetë, patjetër se duhet ndëshkuar. Për momentin nuk do të japë dorëheqje, por të shohim. Ende neve nuk na është dorëzuar diçka zyrtarisht për dorëheqje, as nga Qeveria e Republikës së Kosovës dhe as nga ndërkombëtarët. Derisa nuk ka diçka zyrtarisht, është shumë herët me dhënë një mendim rreth kësaj”, tha Peci.
Peci, i cili po vazhdon të kryej detyrën e kryetarit që gati pesë muaj nga një zyrë alternative në fshatin Kelmend, tha se deri tani nuk ka pasur vizita nga qeveritarët, ndonëse pranon se komunikon përmes emailit dhe telefonit, kryesisht me ministrin e Pushtetit Lokal, Elbert Krasniqi.
Mirëpo, Peci, i cili vjen nga radhët e Partisë Demokratike të Kosovës, në një intervistë për Kosovapress, bëri të ditur se vizitat nuk kanë munguar nga kryetari i kësaj partie, Memli Krasniqi dhe bashkëpartiakët tjerë, nga të cilët tha se ka marrë edhe këshilla e sugjerime.
Ai nuk është i sigurt nëse do ta përfundojë mandatin e plotë të kryetarit, pasi që siç tha, gjithçka në veri ndërlidhet me rrethanat politike.
Peci ka folur edhe për interesimin e shtuar të qytetarëve serbë të Zveçanit për t’u pajisur me dokumente personale, të cilët kërkojnë shërbime në objektin e improvizuar komunal në Kelmend.
Kryetari i Mitrovicës Veriore, Erden Atiq po e ushtron detyrën nga objekti komunal në veri të Mitrovicës. Po ashtu edhe Lulzim Peci po e ushtron detyrën nga objekti i komunës në Leposaviq. Ai po qëndron në objekt për më tepër se katër muaj.
Ilic Peci ndërkohë së bashku me kryetarin e Zubin Potokut, Izmir Zeqiri, po i kryejnë detyrat nga objektet alternative.
