Kryeministri i Kosovës, Albin Kurti, ka thënë të martën, se nuk do të ketë shtyrje të afatit për targat.
Ai këto deklarata i ka bërë pas Samitit të Ballkanin Perëndimor, që po mbahet në Prishtinë.
Emisari i SHBA-së për Ballkanin Perëndimor, Gabriel Escobar në vizitën e tij të fundit në Kosovë, ka kërkuar që afati për targat të shtyhet për 10 muaj, por kjo ka hasur në kundërshtim nga liderët vendorë. Kërkesën e njëjtë e ka bërë edhe Bashkimi Evropian.
Presidentja e Kosovës, Vjosa Osmani, ka thënë se partnerët ndërkombëtarë duhet adresojnë presionin te Serbia, që sipas saj, është burim i tensioneve. Ajo ka thënë se çështja e targave mbi të gjitha është çështje sundimit të ligjit.
Osmani ka thënë se bandat ilegale në veri nuk po i lënë serbët t’i konvertojnë targat ilegale në ato të Kosovës.
Afati për ndërrim të targave ilegale serbe në ato RKS, duke i shfrytëzuar benefitet e ofruara nga Qeveria, përfundon më 31 tetor.
Kurti: Për targat jemi në kontakt me KFOR-in, ambasadorin e ShBA-së dhe Departamentin e shtetit
Kryeministri Albin Kurti ka thënë se për çështjen e targave është në kontakt me KFOR-in, ambasadorin e SHBA-së dhe Departamentin e Shtetit.
Ai ka thënë se qëllimi i Qeverisë nuk është t’i befasojë aleatët.
“Ne tashmë e kemi bërë një shtyrje të afatit. Në vend se të jetë më 30 shtator, data e fundit është 31 tetori ku të gjithë qytetarët e Kosovës të cilët kanë automjete me targa të stërvjetruara, do të mund t’i konvertojnë ato në targa legjitime. Unë ju bëj thirrje të gjithë qytetarëve që ato vetura që janë me ato targa t’i konvertojnë në targa legjitime. Shumica dërrmuese serbeve në Kosovë i kanë konvertuar targat”, ka thënë ai.
Kurti ka shtuar se fushata po vazhdon, nëpër media e takime në mënyrë që targat RKS të shtohen, e targat tjera të jashtëligjshme të hiqen.
Ai ka thënë se do të bëjnë më të mirën e mundshme lidhur me këtë vendim.
Sipas tij, këto masa nuk janë kundër serbëve, por për serbët.
Ka shtuar se nuk mund të jenë qytetarët e barabartë në Kosovë nëse kanë targa të ndryshme.
“Edhe kur partnerët na japin sugjerime, ne i marrim seriozisht dhe i trajtojmë me kujdes. Unë jam vazhdimisht në kontakt me ministrin tim të brendshëm dhe me drejtorin e Policisë. Jam në bashkëpunim me komandantin e KFOR-it, me ambasadorin amerikane dhe State Departamentin. Ne nuk duam asnjëherë t’i befasojmë aleatët e miqtë, por kriminelët. 135.000 qytetarë serbë i kanë letërnjoftimet e Kosovës, pra edhe në këtë rast nuk bëhet fjalë për gjithë komunitetin, por për një pakicë që bën mirë t’i konvertojë targat”, ka thënë ai.
Sipas tij, fushata negative dhe aktet kriminale të dhunës që e kanë origjinën në Beograd po e vështirësojnë fushatën për konvertim të targave.
