“Sulmi paraushtarak dhe terrorist ndaj Policisë së Kosovës në Banjskë të Zveçanit u krye nga Klani i Novi Sadit, i udhëhequr nga ministri i Mbrojtjes i Serbisë, Millosh Vuçeviq”.
Janë fjalët e kryeministrit Albin Kurti, i cili gjatë një postimi në rrjetin social Facebook, e përkufizoi presidentin serb Aleksandër Vuçiç si “Capo di tutti i capi”, term i përdorur për të identifikuar bosët e fuqishëm të mafias.
“Para dy dekadave, në Serbi sundonte Klani i Zemunit, kurse tani vendin e tij e ka zënë Klani i Novi Sadit. Kriminelë në luftë, kriminelë në paqe, kriminelë në Serbi, kriminelë në Kosovë. Presidenti i shtetit, Aleksandar Vuçiq, porsi një capo di tutti i capi, ndodhet aty për të dëshmuar që ndonëse krimi e dikton shtetin, në fakt, është shteti që e dikton krimin”.
Sipas Kurtit, 40 pelegrinë ortodoksë nga Novi Sadi gjendeshin në manastirin e Banjskës, ku ishin fshehur agresorët më 24 shtator.
“Ndoshta e rastësishme, por hetimet duhet ta tregojnë”, shkruan kryeministri.
Ai shton më tej se grupi terrorist në arrati, i udhëhequr nga Millan Radoiçiq, po qëndron në Rashkë ku, siç thotë, janë pajisur me automjete nga autoritetet serbe.
“Kosova nuk ka juridiksion në Serbi. A nuk do të duhej që BE dhe SHBA ta formojnë një Gjykatë Speciale për Klanin e Novi Sadit? Mafia ballkanike do të përjetonte goditje fatale, ndërkaq rajoni i Ballkanit do të hapej i tëri për demokraci evropiane, drejtësi ligjore, paqe të qëndrueshme dhe zhvillim të përshpejtuar”, tha mes tjerash kryeministri Kurti.
Kosova dhe Serbia kanë nisur hetime paralele për ngjarjet në Banjskë, ndërkohë që Bashkimi Evropian i ka bërë thirrje Beogradit të bashkëpunojë plotësisht për këtë çështje.