Kryeministri Albin Kurti ka deklaruar të mërkurën në një konferencë për media mbajtur pas mbledhjes së rregullt të qeverisë, se në tri raste është refuzuar të shkruhet drafti i Asociacionit për komunat me shumicë serbe. Kurti tha se kishte propozuar edhe modelin kroat për pakicën serbe, por edhe ai ishte refuzuar nga BE.
“Në i kemi plotësuar të gjitha standardet dhe kushtet e parakushtet për KiE. Kërkesa që të dërgohet draftstatuti i Lajçakut dhe emisarëve të tjerë në Gjykatën Kushtetuese të Kosovës është rrezuar tri herë në Institucionet e Këshillit të Evropës. Herën e parë më 27 mars në Paris, herën e dytë me 16 prill në Strasburg dhe herën e tretë në Asamblenë Parlamentare. Në anë tjetër ekziston letra e garancisë në të cilën siç kanë kërkuar kemi thënë që marrëveshje bazike, aneksi i zbatimit dhe pa e përjashtuar nenin 7 që është i përfshirë Asociacioni vjen pas anëtarësimit. Ne nuk i mohojmë dhe do t’i zbatojmë. Por, e ritheksoj që nuk ka mundësi nga pikëpamja e Qeverisë së Kosovës që të flitet për Asociacion e komunave pa filluar rend me marrëveshjen bazike dhe Aneksin”, ka deklaruar Kurti.
Kurti tha se me herët kanë propozuar që vetë qeveria të draftoj draftin e Asociacionit me tri shtylla, por nuk janë pranuar nga BE.
“Më është thënë se draftstautin duhet ta shkruaj ekipi menaxhues, nuk e shkruan kryeministri. Vërejtja ime ishte se unë jam kryemenaxheri. U refuzua që ta shkruaj draftstautin bazuar në tri shtylla, u refuzua që drafti të shkruhet në modelin kroat”, ka thënë ai.
Kryeministri edhe një herë pas mbledhjes së qeverisë foli për marrëveshjen e 26 tetorit të vitit të kaluar, të cilën nuk e ka nënshkruar presidenti i Serbisë.
“Nëse do të nënshkruhej marrëveshja, drafti do të mund të shkonte në Kushtetuese. Drafti të nxirret nga paketa, të vendoset në qendër të rëndesës, nuk është e mundshme. Nuk mundet njëri nen, nga 11 nene gjithsej plus aneksi i zbatimit, artificialisht, arbitrarisht të vendosen në qendër, ose si prioritete pa e shkatërruar paketën. Jam në mbrojtje të marrëveshjes bazike. Po e ritheksoj si më herët. Nuk ka mundësi të flitet pa Asociacionin pa ia filluar rend për aneksin e zbatimit të marrëveshjeve”, tha ai.
Kryeministri në pyetjen e gazetarëve tha se kishte propozuar modelin kroat, por edhe ai ishte refuzua.
“Serbia me Kroacinë kanë marrëveshje normalizimi, atje quhet Këshilli Kombëtar i Serbëve. Edhe Kroacia është vend anëtar i BE-së dhe NATO-s e mora si shembull, dhe kjo u refuzua. U refuzua ta shkruajë unë draftin, u refuzua që të shkruajë në modelin kroat, dhe u refuzua nënshkrimi i paketës më 26 tetor. Nuk mund të kthehemi tash në vitin 2013. Jemi më 8 maj, jo me 8 mars”, tha kryeministri.
Kryeministri foli edhe për sulmin e mbrëmshëm kibernetik ndaj faqeve të institucioneve të Kosovës. Ai tha se këto sulme duket se kanë ardhur nga Federata Ruse ose edhe nga veglat e tyre që i kanë rrotull, e që për synim kanë luftën hibride e cila ka për pasojë të destabilizimin e institucioneve të sigurisë dhe stabilitetit të Kosovës.
