Kryeministri i Kosovës, Albin Kurti ka takuar ambasadorin e Suedisë në Kosovë Jonas Westerlund me të cilin kanë biseduar për bashkëpunimin midis dy vendeve, zhvillimin ekonomik si dhe procesin e antarësimit të Kosovës në BE.
Në njoftim bëhet e ditur se Kurti dhe ambasadori Westerlund kanë diskutuar edhe për dialogun me Serbinë si dhe për zgjedhjet që priten të mbahen në katër komunat veriore.
“Kryeministri i Republikës së Kosovës, Albin Kurti, i shoqëruar nga ministrja e Ekonomisë, Artane Rizvanolli, mirëpriti ambasadorin e Suedisë në Kosovë, Jonas Ëesterlund.
Duke biseduar për marrëdhëniet ndërmjet dy shteteve, kryeministri Kurti dhe ambasadori Ëesterlund, theks i dhanë diskutimit rreth Odes Ekonomike Nordike në Kosovë të themeluar po këtë vit, dhe mundësive për rritjen e shkëmbimeve tregtare.
Ata folën edhe për procesin e integrimeve evropiane dhe zgjerimin në dritën e takimeve me Presidenten e Komisionit Evropian, Ursula von der Leyen, në Athinë, ku u bisedua për Planin për Zhvillim të Bashkimit Evropian dhe fjalimin e Presidentit të Këshillit Evropian, Charles Michel, i cili në Forumin Strategjik të Bledit bëri thirrje që viti 2030 të synohet si afati deri kur BE dhe vendet e Ballkanit Perëndimor të jenë të gatshëm për zgjerim dhe anëtarësim.
Në takim u bisedua edhe për çështjet aktuale, përfshirë dialogun dhe zgjedhjet që pritet të mbahen në katër komunat në veri të Kosovës.”, thuhet në njoftim.
