Kryeministri i Kosovës, Albin Kurti, në një intervistë të dhënë për median prestigjioze britanike “The Guardian” para vrasjes së një polici dhe lëndimit të dy të tjerëve (gjatë mëngjesit të 24 shtatorit), njëri me armë zjarri, ka folur rreth dialogut me Serbinë dhe zhvillimeve të fundit.
Siç shkruan mediumi në fjalë, Kurti e akuzoi Vuçiqin për ofendime ndaj tij gjatë bisedimeve, të cilat ai tha se ishin bërë një dukuri e rregullt pa asnjë përpjekje nga ndërmjetësit për ta ndaluar atë.
“Ai shpesh gjatë këtyre dy viteve ofendon dhe shan serbisht”, ka thënë Kurti. “Kam kërkuar nga ndërmjetësit ta ndalojnë dhe ta dënojnë, por kjo nuk ndodh kurrë.”
Në një samit tjetër në Moldavi më 1 qershor, ku morën pjesë Emmanuel Macron i Francës, Olaf Scholz i Gjermanisë dhe shefi i politikës së jashtme të BE-së, Josep Borrell, Vuçiç synoi sharje ndaj presidentes së Kosovës, Vjosa Osmani, sipas zyrës së saj.
“Ai iu drejtua presidentes së Kosovës dhe stafit të saj përcjellës me termin nënçmues dhe çnjerëzor minjtë”, tha Blerim Vela, shefi i kabinetit të Osmanit. “Tërbimet e Vuçiqit pasqyrojnë personalitetin e tij dhe paaftësinë e tij për të pranuar opinione të ndryshme”.
Më tej, “The Guardian” shkruan se një burim ka thënë se megjithëse Macron dhe Scholz nuk mund të kuptonin se çfarë po thoshte, “gjuha e trupit të Vuçiqit tregoi se ai ishte i irrituar” dhe nuk dëshironte të ishte në dhomë me kosovarët.
Kurti nuk do të specifikonte se çfarë epitetesh ka përdorur presidenti serb kundër tij, por diplomatët kosovarë thanë se një nga fjalët fyese të përdorura në takimet e mëparshme ishte “shiptar”, një fyerje etnike në serbisht për t’iu referuar shqiptarëve.
“Ndjehet si një dhunues shkolle të cilit i jepet nderime nga administrata e shkollës, përveç se në këtë rast dhunuesi i shkollës kreu gjenocid dhe është një aleat i vendosur i [Vladimir] Putinit”, tha Kurti.
