Kryeministri i Kosovës, Albin Kurti, në ditën e dytë të Samitit të Ballkanit Perëndimor kundër Diskriminimit Racor, ka thënë se barazia nuk është destinim, por sipas tij është pikënisje.
Në fjalën e tij, Kurti ka thënë se “për të ruajtur bashkësinë duhet ta luftojmë diskriminimin e për të trajtuar rastet e diskriminimit duhet ta bëjmë këtë aty ku është më së shumti i pranishëm”.
“Deri më tani qytetarët e vendit tonë kanë raportuar raste të ndryshme në kompani private, institucione shëndetësore, në polici e universitete. Ekipi ynë ka trajtuar çdo rast. Raportimet që nuk bëhen veprime, nuk kanë dobi e nganjëherë ngjan edhe kundërproduktive”, u shpreh kreu i ekzekutivit.
Kurti ka folur mbi veprimet e qeverisë kundër diskriminimit.
“Barazia nuk është destinimi, është pikënisja. Duhet të fillojmë si të barabartë. Me platformën online jemi kujdesur që përmbajtja, substanca t’i paraprijë formës. Me investime nga Qeveria synojmë që 15 për qind të praktikave të ofruara të jenë për të rinjtë të komunitet jo shumicë”, tha tutje ai.
Kryeministri Kurti thekson se që e kupton që politika është betejë e ideve por potencon se qeverisja është shërbim demokratik.
“Te unë mund ta gjeni kryeministrin si një kryeshërbëtor”, tha Kurti.
