Kryeministri i Kosovës, Albin Kurti, ka organizuar pritjen për gazetarët me rastin e festave të fundvitit.
Ai tha se ende nuk janë në gjysmë të mandatit, por për këtë periudhë ka pasur progres, por edhe sfida janë evidente.
“Viti 2022, ishte vit i krizave të shumëfishta, por në Republikën e Kosovës, njëkohësisht ishte vit i rritjes ekonomike, ligjshmërisë dhe demokracisë brenda vendit tonë, si dhe imazhit të Kosovës jashtë në botë”, tha ai.
Shefi i ekzekutivit ka falënderuar gazetarët për bashkëpunimin dhe raportimin e përditshëm, sidomos gjatë këtyre ditëve nga veriu i vendit.
I pari i qeverisë ka folur edhe për zhvillimet e fundit rreth barrikadave që kanë filluar të hiqen nga sot.
“Barrikadat po hiqen, të dielën e thamë që është çështje ditësh është kur do të largohen, edhe më mirë që kjo do të bëhet pa ndërhyrjen e Policisë sonë. Vet i vunë barrikadat, vet i hoqën ato, me fjalë të tjera janë lodhur kot ata të cilët e bllokuan veten”, tha ai.
Sipas tij, opozita nuk ka dhënë ide gjatë kësaj kohe të qeverisjes së tij, përveç heqjes së TVSH-së, e për të cilën la të kuptohej se nuk mund të ndodh dhe si me shaka tha se i falënderon.
Kryeministri Kurti foli edhe për planet e synimet që ka për vitin 2023, me ç’rast theksoi se do të jetë vit i Vettingut në sistemin e drejtësisë./KosovaNews
