Kryeministri i Republikës së Kosovës, Albin Kurti, ministrja e Arsimit Shkencës, Teknologjisë dhe Inovacionit, Arbërie Nagavci dhe zëvendësministri i Punëve të Brendshme, Bardhyl Dobra, vizituan Institutin Francez në Prishtinë, ku janë pritur nga ambasadori francez në Kosovë, Olivier Guérot.
Kryeministri Kurti falënderoi ambasadorin Guérot për mikpritjen dhe për mundësinë e njohjes së qytetarëve të Kosovës me Francën dhe frëngjishten.
Me këtë rast, profesori francez Christophe Goddard nëpërmjet një lidhjeje elektornike prezantoi punën që ai dhe bashkëpunëtorët e tij po bëjnë në fushën e historisë dhe kërkimeve arkeologjike në Kosovë, në kuadër të bashkëpunimit me Universitetin Publik të Prishtinës.
Mundësinë e mësimit të gjuhës frënge në këtë Institut, kryeministri Kurti e cilësoi si përparësi shumë të madhe, si në raport me artin dhe kulturën ashtu edhe nga perspektiva profesionale.
Ndërsa, ambasadori i Francës në Kosovë, Oliver Guérot tha se, nga mesi i shtatorit do të lansohen kurse të gjuhës frënge dhe se ky Institut po bënë gjëra të shkëlqyeshme dhe do të mbetet çdo herë partner i bashkëpunimit.
Instituti Francez në Kosovë, funksionon në kuadër të Ambasadës Franceze, me seli në Prishtinë.
