Lëvizja Vetëvendosje ka vazhduar fushatën elektorale në qytetin e Pejës, nga ku kandidati për kryeministër, Albin Kurti e quajti 9 shkurtin referendum. Tha se në mandatin e ri do të krijohet Byroja për Konfiskimin e Pasurisë së pajustifikueshme. Tha se do të bëhet edhe vetingu në drejtësi e do të krijohet edhe një prokurori e re speciale kundër krimit të organizuar e korrupsionit.
“Më 9 shkurt ka referendum, ka referendum për Republikë e jo zgjedhje për parti. E përgjigjja po e përgjigjja për, në këtë referendum e ka numrin 118”, tha Kurti.
Ai iu premtoi pejanëve se në mandatin e ri qeverisës krahas investimeve prej gjysmë milioni në Brezovicë, do ta bëjnë edhe Borean në Pejë e edhe teleferikun në Rugovë.
“Ne do ta bëjmë Brezovicën. Brezovicën ia kemi marr Beogradit, e kemi fiskalizuar me Republikën Kosovës. Brezovica është e jona, sepse do t’i investojmë 500 milionë euro, por ne do ta bëjmë edhe Borean këtu në Pejë, sepse për turizëm i kemi dy vargmale, dy palë bjeshkë, edhe të Sharrit edhe të Rugovës. Do ta bëjmë edhe Borean e pastaj padyshim se radha i vjen edhe Gjeravicës. Do ta bëjmë edhe teleferikun në Rugovë. Do ta ndërtojmë e zgjerojmë rrugën, magjistralen e Dukagjinit që lidhë Prizrenin- Rahovecin-Deçanin me Pejën e Istogun. Do të vazhdojmë me ndërtimin e dy rrugëve jetike Deçan-Plavë dhe Pejë-Rozhajë. Do të procedojmë me rrugën Pejë–Kuqishtë-Bogë që është shumë e rëndësishme për Pejën, Rugovën, turizmin e pushimin. Pejë –Kuqishtë- Çakorr e kemi ndarë buxhetin e sivjet i fillojmë punimet”, tha Kurti.
Ai tha se në mandatin e ardhshëm do të bëhet Fondi Sovran, derisa tha se paga minimale do të bëhet 500 euro.
Përmes dritares për investime të diasporës, Kurti tha se do të mbështeten ndërmarrësit që investojnë deri në 100 milionë euro në Kosovë.
Premtoi edhe investime në shëndetësi në Pejë. “Në spitalin e Pejës e kemi shtuar shërbimin e rezonancës magnetike. Po e ndërtojmë depon moderne të barnave dhe po punojmë në funksionalizimin e sallës gjinekologjike. Transforimet e reja në spitalin e Pejës do të vazhdojnë në bllokun operativ e sidomos në Ortopedi”, tha ai.
Kurti tha se gjatë këtyre katër viteve rritën ekonominë, e edhe buxhetin për ushtrinë.
Ai tha se gjatë këtyre katër viteve pati rritje ekonomike e cila u shpërnda për gjithë popullsinë, pa lënë asnjëri prapa, më së shumti, sipas tij, aty ku nevojat ishin më të mëdha.
“Gratë, fëmijët, rinia, studentët, pleqtë të sëmurët, por kemi mbështetur edhe ndërmarrësinë, prodhimtarinë industriale, bujqësore, zejtare, e duke rritur buxhetin për policinë tonë, cep më cep ia kemi bashkëngjitur shtetit tonë sovranitetin e territorit tonë integritetin gjithandej, por në veçanti në veri të Kosovës”, tha Kurti.
