Kryetari i Partisë Demokratike të Kosovës (PDK), Memli Krasniqi, ka reaguar ashpër ndaj vendimit të kryesuesit Avni Dehari për të thirrur vazhdimin e seancës konstituive në orën 22:00, duke e quajtur këtë veprim si pjesë të një qasjeje autoritare dhe jo si përpjekje për të gjetur zgjidhje.
“Vazhdimi i abuzimit u pa edhe sot përmes qasjes imponuese të kryesuesit të seancës”.
”Ftesa për të vazhduar në orën 22:00 nuk ka për qëllim zgjidhjen e ngërçit institucional apo respektimin e Kushtetutës, por vetëm vazhdimin e talljes me shtetin dhe qytetarët nga ana e partisë së parë”, tha Krasniqi pas dështimit të 53-të të seancës konstituive.
Ai shtoi se për shkak të kësaj qasjeje, nuk do ta mbajë fjalën e planifikuar në këtë fazë të seancës, por do të kërkojë të flasë në vazhdimin e saj.
“Gjatë gjithë kohës sa kam qenë deputet, një situatë më absurde nuk kam përjetuar”, theksoi ai.
