Kryetari i Partisë Demokratike të Kosovës, Memli Krasniqi, deklaroi se për dy vjet qeverisje, Qeveria Kurti e ka rritur koston e jetesës për qytetarët, nëpërmjet veprimeve të saj.
Ai tha në Facebook të premten se Qeveria e ka keqkuptuar dhe keqpërdorur misionin e saj, ndërsa shtoi se u vendos edhe rritja e çmimit të energjisë elektrike për 15 për qind.
Krasniqi deklaroi se simbol i kësaj qeverie është sekseri i tregtisë me energji, Martin Berishaj.
“Vitin e kaluar e rritën mbi 100% çmimin e energjisë elektrike. Megjithatë, kësaj qeverie, që simbol të saj e ka sekserin e tregtisë me energji, Martin Berishajn, nuk u mjaftoi kjo. Dje, çmimin e energjisë elektrike për të gjithë qytetarët tanë e rritën edhe për rreth 15 %. Ky veprim është goditje e radhës për të gjitha familjet kosovare, të cilat, në këtë periudhë të krizës dhe ngritjes së të gjitha çmimeve të tjera, po varfërohen çdo ditë e më shumë. Në këto dy vjet, përmes të gjitha veprimeve të saj, kjo Qeveri vetëm sa e ka rritur koston e jetesës për qytetarët e Kosovës, duke keqkuptuar dhe keqpërdorur në thelb misionin e saj”, shkroi ai.
Sipas Krasniqit, nëpërmjet kësaj qeverisjeje, qytetarëve po iu vështirësohet jeta, e siç tha kreu i PDK-së, nga kjo do të vazhdojë emigrimi.
“Një gjë është e sigurt: me këtë lloj qeverisjeje, e cila po vështirëson dhe rëndon jetën e qytetarëve në çdo aspekt, numri i atyre të cilët do të emigrojnë do të vazhdojë të thyej rekorde të reja. I indinjuar thellësisht me këtë kaos qeverisës, i cili po e kërcënon në vazhdimësi mirëqenien e qytetarëve dhe stabilitetin e shtetit tonë. Mjaft më”, tha deputeti i partisë opozitare.
