Operatori i Sistemit, Transmetimit dhe Tregut të energjisë elektrike (KOSTT) ka demantuar deklaratat dhe raportimet që kanë qarkulluar në media, sipas të cilave EFT LLC do të furnizojë qytetarët e Republikës së Kosovës me energji elektrike më 28 nëntor 2025. KOSTT ka theksuar se informacioni i shpërndarë është i pasaktë dhe nuk pasqyron situatën aktuale të tregut të energjisë.
Sipas të dhënave zyrtare të Operatorit të Tregut, EFT LLC nuk ka rezervuar kapacitete ndërkufitare për furnizimin e konsumit të brendshëm në Kosovë, por ka bërë rezerva për qëllime transiti të energjisë elektrike. Rezervimet e kapaciteteve ndërkufitare realizohen përmes SEE CAO (South East Europe Coordination Center), i cili është përgjegjës për alokimin e kapaciteteve ndërkufitare për import dhe eksport të energjisë elektrike në rajon.
KOSTT ka shpjeguar se operatorët e tregut, përfshirë EFT LLC, rezervojnë kapacitete për tregti ndërkufitare nëpërmjet ankandeve eksplicite të bazuara në Net Transfer Capacity (NTC), sipas kërkesave të rregullores evropiane dhe Traktatit të Komunitetit të Energjisë. Këto kapacitete alokohen në përputhje me një metodologji të caktuar dhe të hyrat nga shfrytëzimi i tyre shpërndahen midis operatorëve të sistemeve të transmetimit (OST) përkatës në rajon.
KOSTT, si themeluese dhe aksionare e SEE CAO, thekson se ky informacion është i rëndësishëm për të ruajtur transparencën dhe besimin e publikut. KOSTT mbetet e angazhuar për komunikim të qartë dhe korrekt me qytetarët dhe opinionin publik lidhur me proceset e tregut të energjisë elektrike.
KOSTT fton qytetarët dhe palët e interesuara të konsultohen me informacionet zyrtare dhe të qëndrojnë të informuar për çdo zhvillim të ri në fushën e energjisë elektrike.
