Me rastin e Ditës Botërore të HIV/AIDS, Ministria e Shëndetësisë në bashkëpunim me Institutin Kombëtar të Shëndetësisë Publike të Kosovës organizon tryezë të rrumbullakët më 1 dhjetor 2025, në Hotel “Sirius” në Prishtinë.
Ky aktivitet ka për qëllim të rrisë ndërgjegjësimin mbi HIV/AIDS, të diskutojë masat parandaluese dhe sfidat aktuale në trajtimin e kësaj sëmundjeje në Kosovë.
Sipas të dhënave të fundit, numri i rasteve të regjistruara mbetet i ulët krahasuar me vendet e tjera të rajonit, por ekspertët shprehin shqetësim për mungesën e testimeve të rregullta dhe stigmatizimin që pengon shumë persona të kërkojnë ndihmë.
Ministria e Shëndetësisë nënvizon rëndësinë e forcimit të programit të edukimit shëndetësor dhe aksesit të sigurt te medikamentet për të gjithë qytetarët, duke e konsideruar këtë një hap të rëndësishëm drejt kontrollit më të mirë të epidemisë në vend.
Tryeza e rrumbullakët do të mbledhë profesionistë shëndetësorë, përfaqësues të institucioneve publike dhe organizatave joqeveritare për të diskutuar strategjitë e ardhshme dhe politikat që synojnë përmirësimin e shëndetit publik në Kosovë.
