Vendimi për sanksione të reja pritet të merret në mbledhjen e sotme të Qeverisë së Kosovës.
Në rendin e ditës të cilin e ka publikuar Qeveria, vendosja e sanksioneve ndaj grupit “Wagner” është në pikën e nëntë.
“Shqyrtimi i propozim-vendimit për ndryshimin dhe plotësimin e Vendimit të Qeverisë Nr. 03/78, të datës 16 maj 2022, për vendosjen e masave kufizuese kundër Grupit Wagner – një entitet ushtarak privat i pa inkorporuar, me bazë në Rusi”, thuhet në pikën e nëntë.
Në këtë mbledhje pritet të shqyrtohet edhe propozim-vendimi për emërimin e Bordit të drejtorëve të Ndërmarrjes Publike “Infrakos”.
Qeveria e Kosovës gjithashtu do të shqyrtojë kërkesën e MPJD-së për ndarje buxhetore për mbështetje financiare ndaj gazetarëve ukrainas dhe afganë që po operojnë në Kosovë.
Po ashtu do të shqyrtohen edhe shumë pika tjera, gjithsej janë 21 pika në rendin e ditës, nëse nuk shtohet edhe ndonjë gjatë mbledhjes.
