Presidentja e vendit, Vjosa Osmani ka reaguar lidhur me lajmin që u bë i ditur se Kosova do të organizoj Lojërat Mesdhetare “Prishtina 2030”.
“Triumf i jashtëzakonshëm i sportit kosovar!”, kështu e ka cilësuar këtë ngjarje Osmani.
Osmani ka përgëzuar Komitetin Olimpik të Kosovës dhe institucionet e Kosovës të angazhuara “në këtë arritje të madhe”.
“Pa dyshim se Lojërat Mesdhetare do të jenë frymëzim për shumë të rinj e të reja, si dhe për sportistët kosovarë që të prekin majat e suksesit!”, ka thënë Osmani.
Në Lojëra Mesdhetare marrin pjesë sportistë nga 26 shtete. Kosova pritet të investojë mbi 250 milionë euro për organizimin e kësaj ngjarjeje të madhe sportive.
“Prishtina 2030” do të jetë edicioni i 21-të i Lojërave Mesdhetare. Në këtë ngjarje marrin pjesë shumë shtete që nuk e njohin Kosovën.
Ka pasur përpjekje nga përfaqësuesit e Serbisë që ta bllokojnë kandidaturën e Kosovës, por pa sukses. Në vitin 2026, Lojërat Mesdhetare do të mbahen në Taranto të Italisë.
Lojërat e kaluara Mesdhetare u mbajtën në Oran të Algjerisë, vitin e kaluar.
Në Oran ishin 3298 sportistë. Mbi 3000 sportistë priten edhe në Prishtinë pas shtatë vjetësh.
