Kosova i shkaktoi humbje të rëndë Sllovenisë të shtunën mbrëma, duke e mposhtur 2:0 në stadiumin “Stozhice”. Disfata ishte e rëndë për vendasit jo vetëm në fushë, por edhe në tribuna, ku dominimi i tifozëve shqiptarë ishte i pakontestueshëm, transmeton KosovaNews.
Stadiumi kryesor i Sllovenisë, që zakonisht është shtëpia e përfaqësueses sllovene, këtë herë më shumë ngjante me “Fadil Vokrrin”. Pavarësisht paralajmërimeve të federatës sllovene se nuk do të lejoheshin flamuj të tjerë përveç atyre të Sllovenisë, në secilën tribunë valonin flamuj të Kosovës dhe Shqipërisë. Edhe tifozët pa simbole dhanë përkrahje masive për Dardanët, transmeton KosovaNews.
Në fushë pamja ishte e njëjtë: dominim i plotë i lojtarëve të Kosovës, që siguruan fitoren e dytë radhazi dhe minimalisht kualifikimin në plejof.
Mediumet sllovene kanë raportuar gjerësisht për atmosferën mbizotëruese të tifozëve të Kosovës në “Stozhice”. Për këtë foli edhe trajneri i Sllovenisë, Matjaž Kek, një nga figurat më të njohura të futbollit slloven dhe selektor i ekipit kombëtar.
“Urime Kosovës për fitoren plotësisht të merituar. Lojtarët e Kosovës na mposhtën dhe dominuan në duele si askush deri tani. Edhe në tribuna kjo ishte njëra prej ndeshjeve më të vështira në shtëpi”, ka deklaruar Kek.
Ai e pranoi hapur se atmosfera në stadium ishte e favorshme për Kosovën dhe e ka cilësuar ndeshjen si të luajtur “sikur në udhëtim”, pavarësisht se ishin vendas.
“Të gjitha duelet, të gjithë topat e dytë ishin të Kosovës. Këtë herë na shkatërruan”, shtoi ai, duke kujtuar se përfaqësuesja e tij kishte luajtur shumë më mirë në Prishtinë një muaj më parë.
Pas humbjes, kritikat në Slloveni kanë qenë të shumta. Ish-lojtarë dhe analistë sllovenë kanë shprehur zhgënjim, duke thënë se ishte “e trishtueshme të shihesh kosovarët duke fituar bindshëm në mes të Lubjanës”. Edhe tifozët vendas janë kritikuar për prezencën e dobët në stadium.
Kosova ndërkohë e ka siguruar Play Off-in historik për Botërorin 2026, duke vazhduar serinë pozitive në kualifikime dhe duke e kthyer ëndrrën e madhe në realitet./KosovaNews:
