Ministria e Punëve të Jashtme dhe Diasporës njofton se Republika e Kosovës mbështet plotësisht veprimet proporcionale ushtarake të partnerëve ndërkombëtar kundër grupimit të armatosur Huth.
Në deklaratën e Kosovës thuhet se ky grup përveç që po kërcënon stabilitetin në Lindje të Mesme përmes sulmeve kundër anijeve komerciale, po pengojnë seriozisht edhe qarkullimin e lirë të tregtisë dhe mallrave, gjë që rrjedhimisht po krijon pasoja negative për ekonominë dhe fushat tjera.
“Armiqtë e paqes, stabilitetit, sigurisë, demokracisë, rendit botëror dhe civilizimit janë armiq të të gjithëve. Vetëm së bashku mund të arrijmë që t’i mundim e të krijojmë një botë të qëndrueshme, e cila prioritet ka paqen, bashkëjetesën, tolerancën dhe përparimin në një botë, gjithnjë e më të globalizuar”, thuhet tutje në deklaratë.
Në deklaratë thuhet se veprimet ushtarake të partnerëve të Kosovës, të drejtuara nga Shtetet e Bashkuara të Amerikës në Lindjen e Mesme, kanë synim ruajtjen e rendit ndërkombëtar të bazuar në rregulla dhe se këto veprime kanë rezultuar të domosdoshme pas shtimit të sulmeve kundër paqes dhe stabilitetit.
“Republika e Kosovës, si një vend thellësisht demokratik, rreshtohet qartë në krahë të partnerëve të saj strategjik në përpjekjet e përbashkëta për ruajtjen e paqes dhe sigurisë në botë”, përfundon deklarata.
