Një delegacion i Agjencisë për Cilësi në Arsimin e Lartë të Maqedonisë së Veriut është pritur në Agjencinë e Kosovës për Akreditim (AKA), ku të dy palët janë dakorduar për forcimin e bashkëpunimit rajonal në funksion të zbatimit të standardeve evropiane të sigurimit të cilësisë (ESG) në arsimin e lartë.
Delegacioni nga Maqedonia e Veriut, i kryesuar nga znj. Hristina Serafimovska, drejtoreshë e Agjencisë për Cilësi, përfshinte gjithashtu z. Agim Ramadani, këshilltar shtetëror për arsimin e lartë; z. Ahmed Qazimi, udhëheqës i Sektorit për Arsimin e Lartë; si dhe znj. Lupka Nedelkovska, këshilltare për arsimin e lartë.
Nga ana e AKA-së, delegacioni ishte i përbërë nga z. Naim Gashi, drejtor i përgjithshëm; z. Shkëlzen Gërxhaliu, drejtor për Monitorim dhe Procedura Pasakredituese; si dhe udhëheqëset e divizioneve, znj. Shpresa Shala, znj. Lenda Hyseni, z. Milot Hasangjekaj dhe zyrtarja Leona Barbatovci.
Drejtori Gashi prezantoi para homologëve maqedonas tërë procesin e zhvillimit institucional të AKA-së, përfshirë miratimin e ligjit dhe akteve nënligjore, zgjerimin e infrastrukturës, shtimin e stafit profesional dhe zhvillimin e tyre në përputhje të plotë me standardet ESG dhe procesin e zbatimit të rekomandimeve të Asociacionit Evropian për Sigurimin e Cilësisë në Arsimin e Lartë (ENQA).
AKA shprehu gatishmërinë për të ndarë përvojat dhe mësimet e nxjerra nga procesi i zbatimit të standardeve ESG, të cilat kanë kontribuar ndjeshëm në ngritjen e cilësisë në arsimin e lartë në Kosovë.
Drejtoresha Serafimovska vlerësoi punën e AKA-së, duke theksuar: “si lidere në rajon në përmbushjen e standardeve ESG, AKA përbën një shembull që duhet ndjekur. Ndihma e tyre e parezervë dhe gatishmëria për bashkëpunim përbëjnë një vlerë të shtuar për Maqedoninë në përpjekjet e saj për të avancuar në këtë fushë.”
Delegacioni maqedonas vizitoi gjithashtu ambientet e AKA-së dhe zhvilloi takime me stafin e agjencisë për të diskutuar mbi detyrat dhe përgjegjësitë e tyre në procesin e sigurimit të cilësisë.
