Nën patronazhin e kryeministrit, Albin Kurti dhe me organizimin e Ministrisë së Punëve të Jashtme dhe Diasporës, sot po mbahen punimet e Forumit Ekonomik në mes të Republikës së Kosovës dhe Republikës së Kroacisë.
Në hapje të Forumit, në fjalën e tij para të pranishmëve kryeministri Albin Kurti tha se duke marrë për bazë raportet e mira të shteteve dhe shkëmbimin tregtar e ekonomik që gjithnjë po shënon rritje, duhet që marrëdhëniet të forcohen edhe më tej.
Ndërkaq në kuadër të Forumit gjithashtu është nënshkruar edhe një Marrëveshje Bashkëpunimi mes dy shteteve në fushën e turizmit.
Nënshkrimin e ka bërë ministrja e Industrisë, Ndërmarrësisë dhe Tregtisë, Rozeta Hajdari dhe ministri kroat për Turizëm dhe Sport, Tonqi Glavina.
Në këtë rast ministrja kosovare Rozeta Hajdari ka thënë se synojnë rritjen e shkëmbimeve tregtare me Kroacinë.
Hajdari, në Forumin Ekonomik Kosovë-Kroaci, tha se themelet e bashkëpunimit mes të dyja vendeve janë të kahershme dhe se me kalimin e viteve tregtia mes tyre po rritet.
“Si ministre gëzohem dhe e di që Forumi Ekonomik është i suksesshëm kur bëhen bashkë edhe bizneset. Themelet e bashkëpunimeve tona janë të kahershme dhe për arsye të ndryshme por në veçanti për shkak të historisë së përbashkëta të viteve të 90-ta, por me kalimin e viteve tregtia po rritet”, u shpreh Hajdari.
