Republika e Kosovës dhe ajo e Çekisë kanë nënshkruar Protokollin e parë për bashkëpunim ekonomik në mes të dyja vendeve.
Nënshkrimi erdhi pasi që sot u takuan dy delegacionet e Komitetit të Përbashkët të Bashkëpunimit Ekonomik në Prishtinë.
Delegacioni i Republikës së Kosovës u kryesua nga Mentor Arifaj, zëvendësministër i Ministrisë së Industrisë, Ndërmarrësisë dhe Tregtisë, dhe delegacioni i Republikës së Çekisë u kryesua nga Martin Pospishil, drejtor në Departamentin për Vendet Evropiane në Ministrinë e Industrisë dhe Tregtisë të Republikës Çeke.
Pas pajtueshmërisë të përmbajtjes në protokoll, protokolli u nënshkrua nga zëvendësministri Mentor Arifaj për palën e Kosovës dhe nga Martin Pospishil për palën e Çekisë.
Në një njoftim për medie thuhet se diskutimet në sesione u bënë në atmosferë miqësorë dhe vullnet për të gjetur mënyra praktike dhe efikase, që do të zgjeron bashkëpunimin në mes të dy vendeve.
“Palët u pajtuan për të thelluar bashkëpunimin, ku do të mbajnë takimin e radhës së Komitetit të Përbashkët të Bashkëpunimit Ekonomik në vitin e ardhshëm në Pragë”.
Në këtë protokoll, delegacionet ekonomike nga të dy vendet u pajtuan të bashkëpunojnë në këto fusha: tregti, investimeve, industri, TIK dhe teknologjitë e mençur, energji dhe miniera, standardizim, metrologji, testim dhe vlerësim te komformitetit, ambient, transport dhe agrikulture.
