Përfaqësuesja e Kosovës në futboll ka pësuar rënie në ranglistën e FIFA-s për këtë muaj. Në listën e publikuar të enjten, Kosova renditet në pozitën e 108-të me 1179 pikë të grumbulluara.
Barazimi me Rumaninë dhe humbja nga Bjellorusia, duket se kanë ndikuar në rënien e Kosovës. Është kaluar nga Madagaskari që është ngjitur në pozitën e 107-të, të cilën e kishte Kosova në ranglistën e publikuar në muajin prill.
Për dallim prej Kosovës, Shqipëria ka kërcyer për tri vende më lartë në ranglistën e këtij muaji, falë dy fitoreve që i arriti në kuadër të kualifikimeve për “Euro 2024”. Tani, Shqipëria zë vendin e 65-të me 1357 pikë të mbledhura.
Ndërkohë, në krye të ranglistës, saktësisht në tri vendet e para nuk ka ndryshime. Argjentina është e para me 1843 pikë, e ndjekur nga Franca që është e dyta dhe Brazili, i cili renditet i treti. Anglia është ngjitur në pozitën e katërt, ndërsa Belgjika ka rënë në vendin e pestë.
