Pesë vetura dhe një kombi në fshatin Çeçevë të Zubin Potokut kanë refuzuar të ndalen para patrullës së Policisë së Kosovës, ndërsa personat e dyshimtë kanë filluar të gjuajnë me armë zjarri në drejtim të policëve.
Zëdhënësi i Policisë së Kosovës për Rajonin e Mitrovicës, Veton Elshani konfirmoi se rasti ka ndodhur sot në orët e hershme të mëngjesit.
“Policia ka tentuar me i ndalë pesë vetura dhe një kombi për kontrabandë. Gjatë tentimit për ndalim ka pasur të shtëna me armë zjarri nga ana e tyre, pastaj Policia ua ka kthyer. Pesë persona janë arrestuar, mesin e tyre serbë dhe shqiptarë. Me saktë janë arrestuar katër serbë dhe një shqiptar. Po ashtu jemi në kërkim edhe të një personi tjetër”, tha ai.
Elshani bëri të ditur se ata ishin duke kontrabanduar cigare, rasti u cilësua si “Sulm ndaj personave zyrtar”, “Armëmbajtje pa leje” dhe “Kontrabandim me mallra”.
