Përputhja e qëndrimeve gjeopolitike ndërmjet Kosovës dhe Japonisë, si dhe përkushtimi i përbashkët për ruajtjen e paqes dhe stabilitetit ndërkombëtar, janë theksuar gjatë takimit që ka zhvilluar kryediplomati kosovar, Glauk Konjufca me të ngarkuarin me punë të Ambasadës së Japonisë në Kosovë, Hiroyasu Tanigaki, njofton MPJD.
Përveç kësaj, në këtë takim mes Konjufcës e Tanigakit, bëhet e ditur se është trajtuar edhe pjesëmarrja e Kosovës në EXPO në Japoni, si dhe mundësitë për thellimin e bashkëpunimit ekonomik dhe rritjen e shkëmbimeve tregtare ndërmjet dy vendeve.
“U përmend gjithashtu se Universiteti i Prishtinës tashmë ofron kurse të gjuhës japoneze, duke krijuar një urë të re bashkëpunimi ndërmjet dy vendeve”, thuhet në njoftimin e MPJD-së.
Bëhet e ditur se nikoqiri Konjufca i ka përcjellë urimet e tij Japonisë për formimin e qeverisë së re dhe për emërimin e Kryeministres së re, derisa njëjtë urime ka marrë edhe kryediplomati për detyrën e tij të re.
MPJD-ja thotë se Republika e Kosovës mbetet e përkushtuar për forcimin e mëtejshëm të partneritetit me Japoninë.
