Një incident i rëndë kriminal ka ndodhur rreth orës 18:00 në qytetin e Vushtrrisë, ku një person është arrestuar pas një mosmarrëveshjeje që ka eskaluar në dhunë fizike dhe përdorim të armës së zjarrit.
Sipas raportit të Policisë, konflikti ka ndodhur pas një mosmarrëveshjeje për transportin e grurit, ku i dyshuari mashkull kosovar së bashku me dy persona të tjerë, ka sulmuar fizikisht viktimën, gjithashtu mashkull kosovar, duke i shkaktuar lëndime të lehta trupore.
Gjatë incidentit, njëri nga të dyshuarit ka shtënë me armë zjarri.
Viktimës i është ofruar menjëherë ndihmë mjekësore, ndërsa njësitë policore që kanë dalë në vendin e ngjarjes kanë gjetur dhe sekuestruar një pistoletë me karikator dhe dy gëzhoja të gjuajtura.
Me vendim të prokurorit, i dyshuari i arrestuar është dërguar në mbajtje pas intervistimit.
Ndërkohë, dy të dyshuarit tjerë janë në arrati dhe janë në kërkim nga policia. Rasti është në hetim të mëtejshëm.
