Kirurgu Kushtrim Shala ka kryer një operacion për të cilin është dashur përvoja të cilën Shala nuk e ka pasur, sipas drejtorit të Klinikës së Kardiokirurgjisë, Rifat Brahimaj.
Të mërkurën, Shala e ka paraqitur si sukses operacionin “David” te një pacient me diseksion akut të aortës dhe rupturë në nivel të rrënjës së saj.
Siç e ka shpjeguar ai vetë në Facebook, ky është nga operacionet më komplekse.
Por, pacienti ka vdekur disa orë pas operacionit. Drejtori Brahimaj i tha KOHËS se rasti duhet të hetohet.
“Duhet të bëhet vlerësim i rastit. Duhet të hetohet pse është kryer një operacion i tillë nga një kirurg i cili nuk ka pasur përvojë. Duhet të shikohet rasti dhe të ndërmerren masa konform rregulloreve”, ka thënë ai.
Ai ka theksuar se mjeku ka qenë vetë përgjegjës për operacionin, por që nuk e ka pasur përvojën.
“Ka qenë vetë kujdestar, personi vetë vendos për çfarë lloj operacioni dhe të nesërmen raporton për punën që ka bërë. Masat mund të ndërmerren nëse ka pasur shkelje që s’ka qenë konform me rregulloren dhe kodin profesional. Ka qenë me licencë, nuk ka qenë ilegal, ka vendosur vetë por sigurisht duhet të raportojë më pas dhe të hetohet nëse ka pasur shkelje”, ka theksuar Brahimaj.
I përfshirë në operacion, sipas postimit të Shalës, ka qenë edhe kardiokirurgu Endrit Shala.
Brahimaj ka kritikuar edhe që kirurgu Shala e ka publikuar operacionin me fotografi dhe video. Ai ka thënë se duhet të hetohet edhe pse është publikuar ky rast pa lejen nga SHSKUK-ja.
Shala në Facebook ka publikuar përveç fotografive me stafin mjekësor, edhe procedurën kirurgjike derisa po ndërhynin te pacienti.
Deri më tani nuk është dhënë një përgjigje lidhur me rastin, nga doktori që ka kryer intervenimin, Kushtrim Shala.
