Komandanti i KFOR-it, Gjeneralmajor Enrico Barduani, dhe kreu i Misionit të Bashkimit Evropian për Sundimin e Ligjit në Kosovë (EULEX), Giovanni Pietro Barbano, nënshkruan sot procedurat e përbashkëta operative të rishikuara midis KFOR-it dhe EULEX-it, së bashku me një memorandum mirëkuptimi që rregullon mbështetjen dhe ndihmën e KFOR-it për EULEX-in.
Këto procedura të rishikuara synojnë të përmirësojnë bashkëpunimin dhe mirëkuptimin reciprok midis dy misioneve në kontekstin e operacioneve të mundshme të përbashkëta, në përputhje të plotë me mandatet e tyre përkatëse si përgjegjës për sigurinë.
“Bashkëpunimi i ngushtë midis KFOR-it dhe EULEX-it shërben si shembull i integrimit efektiv të përpjekjeve civile dhe ushtarake për të rritur sigurinë në terren, duke nxitur stabilitetin dhe paqen përmes rritjes sëndërveprueshmërisë”, thuhet në njoftim.
“KFOR -ivazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt dhe të qetë për të gjithë njerëzit dhe komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme. KFOR-i punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX) në rolet e tyre përkatëse si përgjegjës për sigurinë”, vazhdon njoftimi.
