Më 9 dhe 10 qershor 2025, Misioni i NATO-s KFOR, Misioni i Sundimit të Ligjit i Bashkimit Evropian në Kosovë (EULEX) dhe Policia e Kosovës organizuan ushtrimin e përbashkët “Shpata e Artë 2025” në zonën e stërvitjes së Kampit Vrelo, në Prishtinë.
Në këtë aktivitet mori pjesë edhe Forca e Sigurisë së Kosovës, për herë të parë pas disa vitesh, duke trajnuar stafin e saj në trajtimin dhe asgjësimin e sigurt të municioneve shpërthyese dhe materialeve të rrezikshme, në përputhje me mandatin e saj fillestar.
“Ushtrimi ‘Shpata e Artë’ demonstroi integrimin dhe ndërveprimin e arritur midis kontingjenteve, komponentëve dhe aseteve shumëkombëshe të KFOR-it, si dhe aftësinë për të bashkëpunuar dhe koordinuar në menaxhimin e situatave të krizës me reaguesit e tjerë të sigurisë të pranishëm në Kosovë. Uniteti i qëllimit dhe përpjekjes është thelbësor për arritjen e objektivave, dhe në këtë rast, për të qenë i gatshëm të adresojë çdo sfidë që mund të rrezikojë stabilitetin rajonal, për të mirën e të gjitha komuniteteve që jetojnë në Kosovë.”
KFOR-i vazhdon të zbatojë mandatin e tij, të përcaktuar në Rezolutën 1244 të Këshillit të Sigurimit të OKB-së të vitit 1999, për të siguruar një ambient të sigurt dhe të mbrojtur për të gjithë njerëzit dhe komunitetet në Kosovë, duke garantuar lirinë e lëvizjes në mënyrë të paanshme.
Ky mision punon në koordinim të ngushtë me Policinë e Kosovës dhe Misionin EULEX, duke luajtur rolet përkatëse si reagues të sigurisë në terren.
