Shefja e Grupit Parlamentar të Lëvizjes Vetëvendosje, Mimoza Kusari-Lila, ka njoftuar se këtë javë do të mbahen dy seanca të Kuvendit të Kosovës.
Në seancën e dytë për këtë javë, apo të parën për këtë sesion pranveror që do të mbahet të enjten, Kusari-Lila tha se do të shqyrtohet peticioni i nënshkruar nga 17 mijë qytetarë për tërheqjen e kursimeve pensionale.
“Këtë javë do të jenë dy seanca të Kuvendit të Republikës së Kosovës, një do të mbahet të mërkurën me vazhdimin e pikave të papërfunduara të seancës së vjeshtës të datës 14 tetor. Pas kësaj do të vazhdojmë me pikat e papërfunduara të seancave plenare të 15, 22 dhe 23 shtatorit. Pikat e fundit të kësaj seance të ditës së mërkurë janë ato të papërfunduara të seancave të datës 7, 24 tetor dhe 18 nëntor, ku janë tri pika. Përderisa të enjten fillojmë një seancë të re të sesionit pranveror, në të është paraparë përveç pikave të rregullta të rendit të ditës, shqyrtimi gjithashtu i peticionit të nënshkruar nga 17.000 qytetarë për tërheqjen e kursimeve pensionale, pastaj shqyrtimi i raportit me rekomandime për mbikëqyrjen e zbatimit të ligjit për Inspektoriatin e arsimit. Shqyrtimi i raportit vjetor të Komisionit Qendror të Zgjedhjeve për vitin 2021, si dhe shqyrtimi i raportit përfundimtar të Komisionit Hetimor parlamentar lidhur me procesin e vendimmarrjes në sektorin e energjisë për periudhën 2006-2021 në nivelin legjislativ, ekzekutiv, rregullator dhe atë të ndërmarrjeve publike”, ka thënë ajo.
Kusari-Lila shtoi se grupi parlamentar të cilin e udhëheq ka qëndrim të qartë dhe të pandryshueshëm lidhur me këtë pikë, duke mos e mbështetur tërheqjen e 30 përqindëshit të fondit të kursimeve pensionale.
“Qëndrimi i Grupit Parlamentar të Lëvizjes Vetëvendosje është i qartë. Ne nuk e kemi mbështetur tërheqjen e 30 përqindëshit të fondit të kursimeve pensionale, konsiderojmë që në aspektin ekonomik mund të ketë një ndjesi të zgjidhjes së problemeve në aspektin afatshkurtër, por do të ketë ndikim negativ afatmesëm dhe afatgjatë edhe në mirëqenien e qytetarëve edhe në perimetrat tjerë ekonomikë, përfshirë ngritjen e çmimeve, qarkullimin e cashit dhe humbjen e sigurisë për të gjithë ata që tërheqin fondet pensionale me arritjen e moshës së pensionimit”, ka thënë ajo.
Lidhur me krijimin e Asociacionit të komunave me shumicë serbe, Kusari-Lila ka thënë se Asociacioni njëetnik nuk mbështetet nga grupi i tyre parlamentar.
“Njëetniciteti nuk është parim mbi të cilin është ndërtuar shteti i Kosovës. Nuk ka kërkesa të cilat bëjnë dallimin e qytetarit në aspektin etnik. Asnjë organizatë apo asociacion nuk është votuar në Kuvendin e Republikës së Kosovës, ai që është votuar ka dalë që ka shkelje të dispozitave Kushtetuese dhe aty ka mbetur. Ky është diskutim që duhet të zbërthehet ose të trajtojë nevojat e qytetarëve. Kërkesa po vjen vazhdimisht nga Qeveria serbe në Beograd, ndërsa ne po e trajtojmë me partnerët ndërkombëtarë, po tentojmë të identifikojmë se çfarë ka nevojë”, ka thënë ajo.
PDK kërkon mbështetjen e deputetëve për Trustin
Kurse deputeti i Partisë Demokratike të Kosovës, Abelard Tahiri, iu bëri thirrje deputetëve që ta mbështesin Projektligjin për Trustin, që sipas tij, do t’i ndihmojë qytetarët në përballjen me krizën ekonomike.
Ai deklaroi të hënën para mediave se ky projektligj vjen si rezultat i krizës dhe i mosintervenimit të Qeverisë.
“Projektligji për Trustin kërkesë e qytetarëve që vije si rezultat i krizës dhe mos intervenimin e Qeverisë do të jetë si pikë e parë e rendit të ditës në seancën e parë të sesionit pranveror që do të mbahet të enjten. Ne shpresojë që gjithë deputetët të reflektojnë karshi kësaj kërkese e cila do ta zbusë sado pak gjendjen e rëndë ekonomike të qytetarëve të vendit dhe shpresojmë që të enjten të kalojë në lexim të parë”, deklaroi Tahiri.
