Këshilltari për media i zëvendëskryeministrit Besnik Bislimi, Klisman Kadiu, ka reaguar ndaj raportimeve të disa portaleve në Kosovë, duke i cilësuar ato si keqinformim dhe deformim të qëllimshëm të artikullit të gazetës zvicerane Neue Zürcher Zeitung (NZZ).
Në një postim publik, Kadiu ka publikuar edhe një pjesë të artikullit të NZZ-së, ku thuhet qartë se zëvendëskryeministri Besnik Bislimi dhe ministri i Jashtëm i Serbisë, Marko Gjuriq, asnjëherë nuk janë takuar drejtpërdrejt.
Sipas Kadiut, NZZ në artikullin e saj nuk ka raportuar për “takime sekrete”, por ka përmendur Bislimin dhe Gjuriqin vetëm si emra që kanë qenë ndër pjesëmarrësit e takimeve shumëpalëshe, të cilat organizohen prej më shumë se 10 vitesh nga Ministria e Punëve të Jashtme të Zvicrës dhe organizata amerikane CIG.
Ai thekson se gazeta zvicerane në asnjë moment nuk ka përdorur termin “takime sekrete”, një fakt që është konfirmuar edhe nga vetë Ministria e Punëve të Jashtme të Zvicrës, e cila ka deklaruar se këto nuk janë takime të fshehta.
“Për të shuar definitivisht keqinformimin e qëllimshëm, NZZ saktëson qartë se Bislimi nuk është takuar me Gjuriqin”, ka shkruar Kadiu.
Në reagimin e tij, ai ka përmendur me emër disa portale në Kosovë, përfshirë Gazeta Express, Nacionale, Vox, Periskopi, Insajderi dhe të tjera, duke i akuzuar se kanë raportuar në mënyrë të paskrupullt dhe kanë deformuar përmbajtjen e artikullit të NZZ-së.
Në fund, Kadiu ka kërkuar që këto media dhe analistët që, sipas tij, kanë bërë propagandë, të redaktojnë publikimet e tyre dhe të kërkojnë falje publike për dezinformimin.
