Fati i personave të pagjetur po kërkohet që të mos politizohet. Kështu kërkon edhe themeluesja e Fondit për të Drejtën Humanitare, Natasha Kandiq, e cila thotë se me vullnet politik, Serbia duhet të hedhë dritë mbi këtë brengë të familjarëve që i kërkojnë më të dashurit e tyre. Sipas saj, edhe Serbia dhe Kosova duhet të bëjnë më shumë që kjo çështje të zbardhet.
Mbi 9.000 persona janë zhdukur në Kosovë, ndërsa fati i 1.636 prej tyre ende nuk është zbardhur.
Të dhënat nga libri “Dinjteti për të Zhdukurit”, bazuar në dokumentacionin e Fondit për të Drejtën Humanitare, përfaqësojnë kujtesën e familjeve për të dashurit e tyre. Natasha Kandiq, themeluese e Fondit, theksoi se libri synon të sjellë këtë çështje në dritë, por vullneti politik është vendimtar.
“Në vitin 2023 u nënshkrua deklarata për personat e zhdukur nga presidenti i Serbisë dhe kryeministri i Kosovës. Ajo ka potencial për të nisur procesin e zbulimit të varrezave masive dhe identifikimit, por kërkohet zbatimi i saj”, tha Kandiq.
Silvija Estrige, shefe e seksionit politik të Delegacionit të BE-së në Serbi, tha se çështja e të zhdukurve është humanitare dhe politizimi duhet të shmanget.
“Zgjidhja e fatit të të pagjeturve është çelës i pajtimit dhe pajtimi është pjesë kyçe e procesit të normalizimit ndërmjet Beogradit dhe Prishtinës vendimtare për pajtimin dhe pjesë e procesit të normalizimit ndërmjet Beogradit dhe Prishtinës. Kjo është arsyeja pse kjo çështje është pjesë e dialogut të mbështetur nga BE-ja. Përfshirja politike është e nevojshme për të përshpejtuar procesin dhe për të arritur rezultate”, tha Estrige.
Përfaqësuesit e Komisionit Ndërkombëtar për Persona të Zhdukur i kanë bërë thirrje Kosovës dhe Serbisë që të dyfishojnë përpjekjet e tyre në zgjidhjen e fatit të personave të zhdukur dhe se në këtë drejtim nevojitet bashkëpunimi ndërmjet autoriteteve të Kosovës dhe Komisionit për Persona të Zhdukur të Serbisë.
