Inspektim për fushëveprimtarinë e moteleve po kërkohet nga Vebi Mujku, drejtor i Qendrës për Punë Sociale në Komunën e Prishtinës, pas shtimit të rasteve të abuzimeve seksuale me të mitur.
Në një shkrim në Facebook, Mujku ka thënë se veprimtaria e tyre është e pakontrolluar. Sipas tij “shfrytëzimi i tyre pa kontroll, qoftë i/e mitur, i rritur apo i moshuar vetëm për të realizuar një përfitim momental e dëmton shoqërinë tej mase”.
Mujku ka thënë se pikërisht këto hapësira janë adresë e shumicës së rasteve të abuzimeve seksuale.
“Largimi i kamerave dhe mosruajtja e incizimeve, për krijimin e sigurisë të dikujt, krijon pasiguri të madhe për të tjerët. Kjo veprimtari e cila funksionon me shumicë në Kosovë, në formë të sekretit publik, nuk është legale. Shumica e rasteve të abuzimeve seksuale e kanë adresën pikërisht në këto vende. Shumë abuzime ndodhin me kliente që nuk e kanë as moshën e posedimit të dokumentit të identifikimit. T’i mbrojmë fëmijët tanë duke ushtruar të drejtën prindërore dhe institucionale në njëren anë, dhe të vendosim rregulla dhe inspektim për fushëveprimtarinë e këtyre bizneseve në anën tjetër!” ka shkruar ai.
Rasti që së fundmi ka tronditur vendin ka qenë ai i dhunimit të një 11-vjeçareje. Pesë persona janë arrestuar në fillim të javës për dyshimin për dhunim të saj. Ndërkaq gjashtë të tjerë u arrestuan të premten nën dyshimin për trafikim dhe dhunim të saj, në muajin qershor.
