Fshatrat e Prishtinës këto ditë nuk janë “rahatuar” fare me ujë të pijes.
Reduktimet e njëpasnjëshme kanë bërë që banorët e fshatrave përreth kryeqytetit të mos kenë mundësi të kryejnë nevojat elementare në orët e vona të pasditës.
Një ankues ka thënë se reduktimet tash e disa ditë në fshatin Besi po shkaktojnë pakënaqësi.
“Unë punoj gjithë ditën, vij në shpi në ora gjashtë e s’ka ujë” ka thënë ai.
I njëjti ka pohuar se këto reduktime po i kufizojnë aktivitetet e bashkëfshatarëve të tij.
Sipas tij, pas orës gjashtë pasdite, nuk mund të pastrohen, të lajnë enët dhe të bëjnë asgjë që përfshinë ujin.
Është kontaktuar Kompanina Rajonale e Ujësjellësit “Prishtina”, të cilët kanë sqaruar se përse po bëhen këto reduktime.
“Reduktime kemi nëpër fshatra për shkak të keqpërdorimeve të mëdha. Prej orës 6 në mbrëmje deri në ora 6 në mëngjes. Kjo është për këtë javë, derisa menaxhmenti të marrë një vendim tjetër.” kanë deklaruar nga KRU “Prishtina”.
Sipas tyre, kjo nuk po bëhet as për shkak të prishjeve e as për shkak të punimeve.
“Keqpërdorimet janë shumë të mëdha dhe shpenzimi është shumë i madh. Jemi të detyruar të bëjmë reduktime. Keqpërdorimi është faktori kryesor. Kjo vlen për të gjitha fshatrat e Prishtinës”, shtuan tutje.
KRU “Prishtina” ka kohë që bën thirrje për kursim të ujit të pijes dhe mos keqpërdorim të tij./Indeksonline/
