Faton Bislimi deklaroi se kandidatura e tij varet nga vota e delegatëve. Sipas tij, vetëm Ibrahim Rugova është i patejkalueshëm.
Ai para nisjes së Kuvendit Zgjedhor të LDK-së, u shpreh se është i angazhuar që të paraqesë ofertën e tij për këtë parti.
“Ideja e krejt angazhimit tim është për t’ia dhënë ofertën time LDK-së. As nuk dua të paragjykoj rezultat, as nuk dua të paragjykoj asgjë tjetër. Është në dorën e delegatëve të vendosin, le të jetë kjo ditë tamam festë për LDK-në, sepse një LDK e fortë i duhet Republikës së Kosovës”, shtoi ai.
Bislimi nuk ka dashur të paragjykojë në lidhje me kandidaturën për kreun e LDK-së, duke thënë se kjo varet nga vota e delegatëve.
“Nuk dua të paragjykoj në asnjë moment. Kuvendi nuk ka filluar ende. Çfarëdo që do të deklaroja tani, do të ishte një paragjykim. Është e drejtë e zotëri Abdixhikut dhe secilit tjetër të ofrojë diçka më shumë për LDK-në. Krejt çka unë dua të bëj, është të jap ofertën time për LDK-në. Pjesa tjetër është në duart e delegatëve të LDK-së”, shtoi ai.
Bislimi, i cili po synon kandidaturën e kryetarit, shtoi se vetëm ish-presidenti Ibrahim Rugova është i patejkalueshëm.
“Vetëm një emër i patejkalueshëm në LDK dhe ai është Ibrahim Rugova. Tjetër janë të tejkalueshëm, janë pjesë e procesit. Shumë mirë që janë pjesë e procesit”, përfundoi ai.
Ndryshe, LDK mban sot Kuvendin e dhjetë Zgjedhor. Në garë për kryetar të partisë janë kreu aktual i LDK-së, Lumir Abdixhiku dhe ish-deputeti i Kuvendit të Kosovës nga LDK-ja, Faton Bislimi.
Bislimi ka njoftuar se nëpërmjet një shkrese zyrtari u ka bërë me dije Kryesisë së Lidhjes Demokratike të Kosovës, se ka vendosur që në Kuvendin e dhjetë të LDK-së, do të paraqesë para delegatëve, kandidaturën për kryetar të partisë.
Sekretari i Lidhjes Demokratike të Kosovës, Imri Ahmeti deklaroi se vendimi për kandidaturën e Faton Bislimit për të parin e LDK-së varet nga votat e delegatëve.
Para nisjes së kuvendit zgjedhor, ai tregoi se a do lejohet hyrja e tij.
“Kuvendi është për punimet që duhet zhvillohen vetëm nga delegatët. Jo edhe nga anëtarësia e gjerë. Anëtarësia e gjerë natyrisht përfaqësohet përmes delegatëve të tij. Në kuptimin të kësaj, unë besoj që Kuvendi nuk është i hapur për të gjithë anëtarësinë, sepse nuk i zënë”, tha ai.
I pyetur se a do i lejohet kandidatura Faton Bislimit, ai tha se këtë gjë do e vendosin delegatët.
“Personalisht unë i kam kthyer përgjigje, me email zyrtar i kam treguar që kjo çështje varet nga delegatët, nga shumica e votuesve. Sepse vendimet merren me shumicë votave. Absolutisht hyrja brenda do t’i lejohet”, shtoi ai.
E anëtari i kryesisë së Lidhjes Demokratike të Kosovës, Xhafer Tahiri në hyrje të Kuvendit Zgjedhor të LDK-së, ka thënë se ky organizim është pas një pune të madhe dhe procesi zgjedhor ku kanë marrë pjesë mbi 38 mijë anëtarë.
“Pas një procesi zgjedhor ku kanë marrë pjesë mbi 38 mijë anëtarë të LDK-së dhe sot do të zgjedhim kryetarin e LDK-së dhe pastaj në konventën programore do të aprovohet rruga e re si projekt zhvillimor, si një ide e re, si një projekt që ka në qendër zhvillimin e projekteve të mëdha infrastrukturore, në mënyrë që Kosova të bëhet atdheu siç e ëndërrojmë të gjithë ne”, tha ai.
