Kryetari i Preshevës, Shqiprim Arifi, për CNN ka thënë se kryeministri i Kosovës, Albin Kurti, po përpiqet të jetë Zelensky i Ballkanit.
“Ai përdor argumentin e shtetit ligjor në mënyrë retorike dhe populiste. Ai dëshiron të jetë Zelensky i shqiptarëve”, u shpreh Arifi derisa shton se mënyra më e mirë që të përmirësohet situata është që Kurti të bëjë atë që kërkojnë aleatët perëndimorë: të punojë për të krijuar një “Asociacion të Komunave me shumicë Serbe” në veri të Kosovës, raporton Indeksonline.
Lidhur me këtë qasje të Arifit ndaj Kurtit ka reaguar deputeti shqiptar në Kuvendin e Serbisë, Shaip Kamberi. Ai thotë se me këtë qasje që të të parit të Preshevës kundrejt Kosovës asnjë shqiptar i Luginës së Preshevës nuk pajtohet.
“Kritikat e e paargumentuara të të parit të Preshevës harrojnë apo mohojnë faktin se ishte autokrati Vuçiq ai i cili pas takimit të Ohrit deklaroi se “nuk ka nënshkruar se i dhemb dora e djathtë” dhe se kjo do të zgjasë për “katër vitet e ardhshme”. Ai shkon aq larg saqë akuzon kryeministrin e Republikës së Kosovës se nuk po e krijon “asociacionin e komunave me shumicë serbe” pa kërkuar as dhe një kusht të vetëm për përmirësimin e pozitës së shqiptarëve të Luginës së Preshevës, me dekada është diskriminuar nga Beogradi.
Është e dhimbshme aq sa edhe e dëmshme që në artikullin më pozitiv të mundshëm për Kosovën, në një prej mediumeve më të mëdha botërore, komenti më negativ për Kryeministrin e Kosovës vjen nga një shqiptar i Luginës së Preshevës. Me këtë qasje të të parit të Preshevës kundrejt Kosovës jam i bindur që asnjë shqiptar i Luginës së Preshevës nuk pajtohet”, thotë Kamberi.
